No Consello de Administración de TUSSA o concelleiro do Partido Popular, Ramón Quiroga, afirmou que era preciso e de necesidade a incorporación dos novos vehículos para mellorar a calidade do servizo, “e agora, do dito non se acorda e se contradí deixando ben claro que a palabra do Partido Popular de Santiago non vale nada” critica Muíños.

Santiago de Compostela, 24 de marzo de 2023. O concelleiro de Mobilidade defendeu hoxe a solución provisional adoptada ante o deterioro do servizo de transporte da cidade, “derivado da pasividade dos gobernos anteriores”. Gonzalo Muíños explica que a decisión de incorporar 11 novos vehículos ao transporte urbano obedecían a unha “necesidade urxente” reflectida nos informes técnicos e periciais “polos que se tomou o acordo en Xunta de Goberno”.

Ante as declaracións do concelleiro do Partido Popular de Santiago, Ramón Quiroga, Muíños non oculta a súa “sorpresa” polo que tacha de “inexactitudes” no seu discurso. E é que recorda que, no Consello de Administración de Tussa celebrado o 14 de novembro, o propio edil dos populares “afirmou que era preciso e de necesidade a incorporación de novos vehículos que mellorasen a calidade do servizo e, por suposto, que non tiveran ningunha vinculación co futuro novo contrato” explica un Muíños que se pregunta “a que lle debemos facer caso? Ao momento no que nos di que é necesaria a incorporación dos novos autobuses ou ao momento no que nega esa necesidade?”.

O concelleiro de Mobilidade recalcou ademais que a situación actual é froito de “anos de desleixo” por parte dos gobernos “decepcionantes” do Partido Popular de Conde Roa e de Compostela Aberta: “no 2011, antes de deixar o goberno, nós renovamos a flota segundo recollía o prego de condicións, algo que non foi capaz de facer nin o PP nin CA durante os seus oito anos ocupando o Pazo de Raxoi”.

En todo caso, Muíños aclara que, logo dos diferentes atrancos polos que tivo que pasar o contrato do transporte, froito dos cambios no estudo económico que introduciu a pandemia, “confiamos en que a Oficina de Evaluación Nacional (ONE) remate os seus traballos nos próximos días e poidamos sacar a licitación o contrato canto antes”.