• O portavoz dos socialistas vén de solicitar acceso ao expediente do contrato do anteproxecto que o departamento de Mocidade vén de solicitar para a adaptación das instalacións actuais
• Advirte que en “dous ou tres anos” os bombeiros terán que abandonar as actuais dependencias pola ampliación do edificio administrativo de San Caetano: “de novo anuncios á desesperada para tapar as súas carencias de xestión”

Santiago de Compostela, 7 de maio de 2024. Os socialistas saíron ao paso este martes logo de facerse público que o goberno local encargou un anteproxecto para o reacondicionamento do edificio de Salgueiriños como unha ‘casa da mocidade’. Así, o portavoz socialista, Gonzalo Muíños, critica que esta decisión chegue cando o goberno local non decidiu aínda que facer coa Casa da Xuventude e tampouco cal será a localización do novo parque de bombeiros: “de novo, anuncios á desesperada para tapar as súas carencias de xestión”.

Muíños asegura estar “sorprendido” ante esta decisión do goberno local, ademais de preocupado, toda vez que a partir do 2025 os bombeiros terán que abandonar as instalacións actuais con motivo das obras de ampliación dos edificios administrativos de San Caetano: “este novo anuncio indirecto non responde nin á pregunta de que facer coa Casa da Xuventude nin a onde se van desprazar os bombeiros”.

Así, desde o grupo socialista pídenlle ao goberno local “transparencia e diálogo”, e que explique cales son os seus plans para o edificio de Salgueiriños, e cales son as alternativas nas que traballa para o novo parque de bombeiros. Insiste o portavoz socialista que non se trata “só do parque comarcal” senón de que en “dous ou tres anos poderíamos quedar sen instalacións de parque de bombeiros”.

“Onde está o goberno das políticas valentes” preguntouse ademais Muíños que criticou que o executivo de Sanmartín busque crear unha nova casa da mocidade cando aínda “non se puxo de acordo” para decidir o futuro da Casa da Xuventude.