Sánchez Bugallo aclara que a futura estación do AVE de Santiago está incluida no proxecto de orzamentos do Estado, cun investimento previsto superior aos 30 millóns de euros

Unha noticia “fantástica” sinalou Sánchez Bugallo. “É unha infraestrutura pendente, que ten que completar o coxunto de actuacións que estamos facendo a Xunta de Galicia, a administracion central do Estado e o propio Concello, en todo o ámbito de Clara Campoamor, a estación intermodal, e faltábanos a estación de tren”. A que hai, engade o rexedor, xa “non responde ás necesidades de Santiago, nin as necesidades dos tres millóns de usuarios que tén cada ano”. “Precisamos ter unha estación de tren á altura da terminal de autobuses e á altura do resto de infraestruturas. Estou contentísimo de que saia esa actuación”, afirmou.

Sánchez Bugallo adiantou que “imos intentar sacar, antes de final de ano, con fondos municipais, a conexión desa estacion coa rúa do Hórreo e a súa integración co Ensanche”. Subliña o alcalde que “vai quedar unha área modal de autobuses, coches e tren absolutamente extraordinaria que vai mover, probablemente, máis de seis millóns de viaxeiros cada ano”. Polo tanto, sinala “vai ser fundamental para Santiago, para o Ensanche e para toda Galicia”, porque, continúa, “esa é a estación de Compostela, de Arzúa, de Melide, de Ordes, de Ribeira; de moitos lugares. É unha infraestrutura fundamental, que se une ao que xa coñeciamos, o orbital, o orbitaliño, a EDAR e os fondos para que o Consorcio funcione no ano 2021”, Se ademáis, conclúe, se consegue unha partida para o Ano Santo, “creo que nos podemos dar por moi satisfeitos”.

Para o alcalde, hai que deixar sen efecto a cláusula dos tres millóns de viaxeiros. Neste momento, sinala, “a mellor proba da vontade do goberno é que xa está elaborado o proxecto da nova estación, de tal maneira que podería saír a licitación inmediatamente porque hai proxecto, dispoñibilidade dos terreos, e se se aproban os orzamentos, dispoñibilidade presupostaria”. O que temos que facer, sinalou, é reunir á Comisión Mixta (Xunta de Galicia, Concello, e ADIF) e acordar deixar sen efecto esa cláusula. E todos estamos dacordo en deixala sen efecto. Nunca se debeu pór, e todos estamos dacordo en que hai que quitala”, finalizou.