O voceiro do Goberno Municipal elevou o ton ante as crítica dunha oposición que “só busca facer sangue” e que “semellan padecer algún tipo de amnesia temporal”. Recorda Guinarte que a candidata á alcaldía por Compostela Aberta, María Rozas, propuxo o alugueiro dun local por 8 anos, sito no número 37 da rúa Corredoira das Fraguas “que lle costa ao Concello 853 euros mensuais”: “María Rozas comprometeu máis de oitenta mil euros no alugueiro dun local, por oito anos, sen concorrencia competitiva de ningún tipo” explicou. Serán concretamente 81.932 euros os que o Concello terá abonado ao remate dos 8 anos nos que a edil de CA fixou a duración do contrato.

 Guinarte lamenta ademais que “as leccións de democracia e transparencia veñan dos mesmos aos que se lle sinalaron case dúas decenas de contratos menores adxudicados a dedo a familiares e amigos” e recalca que “nós seguimos agardando as súas explicacións”.  Tamén ao candidato dos populares, Guinarte recoméndalle ser “prudente nas súas palabras”: “Borja Verea debera ser máis cauteloso nas súas denuncias absolutamente gratuítas e faltas de sustentación, porque é posible que teña que dar explicacións en algunha causa actualmente en instrución, segundo publicaron diferentes medios de comunicación”.

O concello mantén actualmente o alugueiro de múltiples locais, tanto para usos administrativos como socioculturais. Algúns incluso desde fai décadas e formalizados ou prorrogados polos diferentes gobernos, sen que foran resultado de ningunha  convocatoria pública, “algún incluso desde fai máis de 20 anos”.

É máis, o voceiro dos socialistas insiste en que “tanto o Partido Popular como Compostela Aberta prorrogaron contratos de alugueiro e formalizaron contratos novos nos que non se realizou proceso algún de concorrencia competitiva”.

En todo caso, insiste Guinarte en que o equipo de goberno non ten nada que ocultar e “seguiremos sendo completamente transparentes como o fomos desde o primeiro momento”. Deixa claro que a única cuestión que se lle pode achacar á formalización deste contrato “foi o erro de Pichel ao non informarnos a ninguén de que tivera unha vinculación accionarial coa empresa propietaria”, algo “que o propio informe do Secretario Xeral do Concello deixa claro ao establecer que non houbo situación de incompatibilidade á hora de aprobar ese contrato”.

“O que se fai nestes casos sempre é buscar o local idóneo para as necesidades do servizo, comprobando sempre que estea a prezos de mercado” explicou o terceiro tenente de alcalde, que recalcou que o acordo que se tomou na Xunta de Goberno “contaba con todos os avais técnicos e, incluso, co informe favorable da intervención”.