• Destaca o 8,5% de incremento das pensións, das que se beneficiarán uns 24.000 veciños e veciñas de Santiago e os 120 millóns de euros en investimentos que recibirá a capital de Galicia por parte do Goberno de Pedro Sánchez

• Sánchez Bugallo: “todas as actuacións que a Corporación Municipal define de forma unánime como prioritarias, están contempladas neste orzamentos”

O alcalde de Santiago, Xosé Sánchez Bugallo, valorou dun xeito moi positivo as cantidades consignadas para Compostela no proxecto dos orzamentos xerais do Estado. Destaca o 8,5% de incremento das pensións, da que se beneficiarán uns 24.000 composteláns e os 120 millóns de euros en investimentos que recibirá a capital de Galicia por parte do Goberno Central. “A todos nos gustaría máis, pero sin lugar a dúbidas, é unha moi importante dotación presupostaria, da que debemos sentirnos satisfeitos”. 

20221007 Alcalde. Valoracion PXE_investimentos

“Hai outros que fan outras valoracións, que as podían ter escritas hai anos porque lles dá igual o que digan os orzamentos”, engadiu. “Primeiro intentáronos convencer de que orzamentos que contemplaban 10 ou 12 millóns de euros eran unha marabilla, e agora que 120 millóns de euros é moi pouco”. “O que lles podo dicir”, engadiu Sánchez Bugallo, “é que eu volvín á alcaldía dez anos despois e a autovía Santiago-Lugo estaba sen acabar e sen avanzar; o orbital estaba sen empezar; do orbitaliño non se sabía nada, da EDAR perdéranse os fondos; e da terminal de viaxeiros (en referencia a nova estación de tren), tampouco se sabía nada, incluso había asinado un convenio de que non se ía facer ata que houbese tres millóns e medio de pasaxeiros. Teño que dicir que todas as actuacións que a Corporación Municipal define de forma unánime como prioritarias, están contempladas neste orzamentos

No capítulo de investimentos, o alcalde destacou que Galicia, representando o 5,8% da poboación española “sigue recibindo o 8% dos investimentos do Estado”. 

Sánchez Bugallo desglosou as partidas destinadas a Santiago: 

• 54,3 millóns de euros para a autovía Santiago-Lugo, “unha cantidade moi relevante que permitiría practicamente rematar o tramo Melide-Palas de Rei en 2023 e Melide-Arzúa en 2024”, indicou. 
• 10,1 millóns “para rematar o orbital”, cun millón máis para o 2024, que “entendo será para cubrir gastos adicionais que se teñan producido na execución da obra”, na que se incluiron “unha serie de actuacións complementarias. A máis significativa é a conexión da veciñanza da aldea do Castro” coa estrada de Lavacolla e coa autovía. 
• 500.000 euros para o orbitaliño. Sánchez Bugallo explicou que  falou “coa Secretaria de estado que me plantexa que é necesario definir, aprobar e resolver todas as dúbidas relativas tanto o trazado como ao seu proxecto, que o importante é que estea o proxecto” pechado, que poida salir a licitación, indicou o alcalde. . 
•  En canto á EDAR, “presupóstanse os 60 millóns da obra, 6,4 millóns (os que van neste proxecto de orzamentos) para a anualidade 2023. Agora mesmo estamos pendentes da autorización medioambiental que esperamos obter en torno ao mes de abril ou maio, para inciar a obra inmediatamente”, sinalou Sánchez Bugallo. 
• 12,6 millóns destinados ás obras da nova estación de tren, “aproximadamente o 40% da actuación prevista”, que “cumplen perfectamente as nosas expectativas. Responde perfectamente a unha obra contratada en 30 millóns e que está previsto rematar no ano 2024”, indicou o alcalde.  
•  Por primeira vez, destacou o rexedor, aparece nos orzamentos a “tan necearia remodelación do Cuartel da Garda Civil”. “Neste momento estase rematando a redacción do proxecto de execución”, ainda que subliñou, “o custe vai ser superior aos 8,3 millóns de euros inicialmente reservados”. 
• Tamén aparecen nos orzamentos, informou, 3,1 millóns de euros para a remodelación da Casa da Parra e do edificio de Azabachería, sede da antiga Seguridade Social. O primeiro está previsto que albergue a sede do Consello Superior de Investigacións Científicas, e o segundo un recinto de exposicións vinculadas ao Instituto Padre Sarmiento eo CSIC. 
• 4,7 millóns de euros destinados ao aeroporto, nestes Proxecto de Orzamentos do Estado. 
• 5 millóns para o Consorcio de Santiago. “Desde o ano 2011 é a primeira vez que sube”. 

O alcalde tamén enumerou outras partidas “non explicitadas nos orzamentos” pero “que están comprometidas e aprobadas”. Citou en concreto: 

• 13,4 millóns de euros para a rehabilitación do Hostal dos Reis Católicos, con cargo aos fondos europeos
• 3 millóns de euros para a rehabilitación do Pazo de Raxoi
• 4 millóns de euros para a Plataforma loxística
• 840.000 euros, para a recuperación do bosque do Banquete de Conxo

Pensións

Sánchez Bugallo destacou en primeiro lugar o aumento da partida destinada a pensións, cunha revalorización que se realiza conforme ao IPC interanual.  Calcula que uns 24.000 cidadáns e cidadás de Santiago se verán beneficiados. En Galicia serán case 800.000 persoas maiores as que verán incrementadas as súas pensións, o que representa case un 30% da poboación.  “E estas pensións non só están garantidas para o ano 2023, se non que reciben unha previsión de incremento dun 8,5%.  Paréceme xusto, necesario e moi importante”. Lembrou que hai uns anos, baixo o goberno do PP, concretamente de Mariano Rajoy, “se tramitara unha modificación da lei para garantir un incremento do 0,25%”. 

20221007 Alcalde_Valoracion PXE_pensions

A esta mellora, o alcalde sumou o IMV, o Ingreso Mínimo Vital e as pensións non contributivas “que tamén contan”, e das que dependen en santiago, máis de 1.600 familias. “Paréceme extraordinariamente importante, polo que representa de calidade de vida, de de xustiza social”. Desde o punto de vista económico, “ese 8,5% de incremento das pensións representa máis de 40 millóns de euros complementarios para Santiago. En conxunto, a cidadanía de Santiago percibe uns 600 millóns de euros anuais en pensións, polo tanto é unha cifra” significativa. En Galicia, segundo os cálculos do rexedor, este aumento significará uns 1.000 millóns de euros máis destinados a este fin, “unha cifra realmente moi importante”. 

Lembranza

O alcalde comezou a rolda de prensa enviando “unha lembranza” a Manuel López Ferreiro, o septuaxenario falecido a consecuencia dun atropelo na rúa do Hórreo, acontecido o pasado martes. Lamentou a perda “dunha boa persoa, moi querida na cidade”, “ primeira vítima nun accidente en Santiago no casco urbano desde o ano 2016”. 

Este atropelo, subliñou “pon en evidencia que non se pode baixar a garda” e que “compre respectar os límites de velocidade establecidos”, de 20 quilómetros na confluencia entre Hórreo e Av. de Lugo, e 30 quilómetros por hora na rúa do Hórreo. “Polos datos dos que dispomos, sabemos que Manuel cruzou polo paso de peóns, e que houbo un vehículo que non cedeu o paso. “As normas deben ser respectadas, continuou, “porque a diferencia respectalas ou non, pode facer que se salven vidas, ou que se perdan vidas”. O alcalde rematou esixindo aos condutores, que respecten as normas de circulación.