Procurando unha cidade máis compacta, establecendo a “conectividade peonil entre todos os ámbitos” como Santa Marta ou o Restollal, Sánchez Bugallo ‘coserá’ a cidade, eliminando as barreiras arquitectónicas que, noutro momento, facilitaron a apertura da cidade: “apostamos pola humanización e as zonas verdes” coa creación do espazo de Antón Fraguas en Conxo, a gran avenida urbana do Restollal, a humanización de Amor Ruibal, a mellora da accesibilidade en Pontepedriña e, agora, co novo bulevar en Romero Donallo.

Santiago de Compostela, 9 de maio de 2023. Na procura dunha cidade “cómoda, accesible e peonil” e traballando por unha “mobilidade sostible”, o alcalde presentou hoxe o seu proxecto para humanizar Romero Donallo e convertelo nun bulevar que una, de xeito peonil, o Castiñeiriño, Pontepedriña, Conxo e Santa Marta co Ensanche.

Na rolda de prensa, acompañado da concelleira de Urbanismo, Mercedes Rosón, o alcalde explicou que tras “abrir a cidade nos anos 80 coa construción do periférico ou o Auditorio” e o impulso á edificación de vivendas nos barrios nos 2000, chega “o terceiro gran cambio”. Bugallo quere acabar coas barreiras de interconexión con diferentes proxectos que melloren o paso a pé e a humanización dos espazos.

Seguindo o modelo das Ramblas, o obxectivo é que Romero Donallo pase de ser “unha barreira arquitectónica” a un “lugar de convivencia e socialización” facilitando a mobilidade peonil con unha  beirarrúa principal no medio de entre tres e cinco metros. Con esta actuación se eliminaría “unha barreira” entre Conxo e a zona sur de Santiago, mellorando tamén a seguridade para os peóns: “as persoas que teñan que cruzar dun lado para o outro só terían seis metros dende as beirarrúas ata a zona central, e non 30 como na actualidade”.

A reurbanización de Romero Donallo sumaríase á reurbanización de Amor Ruibal e Romero Donallo que sairá proximamente a licitación, e que inclúe a creación de sendas ciclistas, áreas verdes e unha zona comercial.

Como explicou o alcalde, cada día pasan 18.000 vehículos por Romero Donallo, dos cales o 50% son de paso. “Temos que motivar que a xente que non vai ao Ensanche empregue o túnel do Hórreo”, indicou Sánchez Bugallo.

Dar continuidade a Clara Campoamor, Hórreo e Amor Ruibal cun novo Restollal

“É un proxecto estratéxico da nosa cidade e seguiremos traballando para sacalo adiante”. Así de claro se amosou o alcalde, convencido de que se obterán os fondos necesarios para converter o Restollal nunha gran avenida urbana, eliminando o paso superior sobre a rotonda, facilitando o xiro ás urbanizacións e reducindo o número de carrís, incorporando un carril bici e priorizando unha maior presenza de vexetación.

O proxecto busca converter esta estrada con aspecto de autovía nunha avenida humanizada con beirarrúas amplas. Para Mercedes Rosón esta actuación do Restollal é “especialmente importante, porque divide dous ámbitos clave”. A concelleira insiste en que a nova veciñanza “merece vivir dunha maneira moito máis amable e urbana”.

Este proxecto continuaría ata Romero Donallo e un Hórreo xa reformado con preferencia peonil que facilita o paso a aquelas persoas que veñen da estación intermodal. O obxectivo do alcalde é seguir un modelo de cidade que favoreza a mobilidade peonil con rúas que sigan o patrón da rúa Clara Campoamor. Nesta liña seguirá tamén a rúa de Amor Ruibal, cunha zona de preferencia peonil na zona do instituto.

No caso de Conxo, a intención é conectar o espazo de diante do Hospital Psiquiátrico co resto do barrio dunha forma cómoda e ampla, superando a barreira física que supón o periférico: “trátase dunha actuación de humanización, para crear espazos de uso cidadán, facendo unha mellora da conectividade real”.

Un modelo de cidade humano

O máis importante para o alcalde é que son actuacións que “van mellorar a calidade de vida dos veciños”. O gran proxecto de coser Santiago forma parte do modelo de cidade que Bugallo quere construír. “O principio de conexión, tecido e humanización dos barrios é irrenunciable para conseguir que Compostela siga o modelo dos 15 minutos andando” explicou o alcalde.

O rural non escapa deste modelo no que a aposta polo transporte público urbano é un tema central. “Estes días, cada vez que imos a un sitio falamos da nova configuración do transporte público”, sinalou Bugallo. O novo modelo que aumenta as frecuencias e as paradas permitirá diminuír o uso dos vehículos privados.