• O alcalde explicou que se “ampliarán e remodelarán” todos os pavillóns de Compostela dotándoos dun ximnasio “para fomentar os hábitos de vida saudables e promover a actividade física”
• O primeiro será o pavillón do Paxonal no que se acometerá unha ampliación de 1.300 metros cadrados

Santiago de Compostela, 16 de maio de 2023. Crear unha rede de ximnasios de barrio en tódolos pavillóns de Compostela. Son os plans de Sánchez Bugallo de cara o próximo mandato co que busca “fomentar os hábitos de vida saudables e promover a actividade física”. Trátase, segundo el mesmo indica, dunha medida “pioneira” que busca “dotar de servizos e infraestruturas os barrios de Compostela”: “Santiago será a primeira cidade galega en contar con unha rede de ximnasios de barrio”.

A primeira pedra desta rede será o pavillón do Paxonal, para o que o alcalde presentou un proxecto de ampliación de 1.300 metros cadrados de superficie que se suman aos 248 contemplados para gradas, ampliando a capacidade do polideportivo en 200 persoas.

“Renovar, ampliar e aproveitar a oportunidade para dotar os polideportivos dun ximnasio” ese é o horizonte que se marca Bugallo co obxectivo de que “as veciñas e veciños que viven na súa proximidade, e que están facendo uso dos parques biosaudables, dispoñan dun espazo cuberto onde poidan realizar os seus exercicios” e que o poidan facer ademais con monitores.

Durante a rolda de prensa, na que tamén participou Toño Bermúdez, número 9 da candidatura de Bugallo, o alcalde destacou tamén a mellora que supón a ampliación do polideportivo para dar servizo a deportes en auxe como hóckey ou patinaxe: “haberá unha maior dispoñibilidade de espazo para ampliar as horas de adestramento das rapazas e rapaces de ximnasia ou de voleibol, por exemplo” explicou Bermúdez.

Os seguintes: Santa Isabel e Vite

O alcalde explicou que o modelo que se usará na ampliación do polideportivo do Restollal exportarase no inmediato ao de Santa Isabel e ao de Vite. Precisamente o proxecto de rehabilitación do pavillón municipal de Vite está actualmente en licitación por un importe de 1,3 millóns de euros.

Tamén a obra contemplada para o Santa Isabel serán dous millóns de euros e implicará melloras en materia de habitabilidade e seguridade, incorporando a renovación das beirarrúas da contorna e a instalación de placas solares.