Subscríbete ao noso boletín
Recibe no teu mail cada semana un resumo das novidades no PSdeG Santiago de Compostela
O alcalde de Santiago, Xosé Sánchez Bugallo, manifestou a súa preocupación pola evolución da pandemia e “polo grao de afectación que as medidas anticovid están tendo, sobre todo no comercio e na hostalería nestas últimas dúas semanas”. Aínda así, amosouse “ilusionado”, pola chegada da vacina.
Sobre os contaxios, sinalou que “a impresión que dá é que se vai ralentizando o crecemento”. Compre esperar como varía nos próximos días, pero sinala, “a evolución de Santiago e do conxunto de España non é positiva”. Os datos de onte, ofrecidos polo alcalde, eran de 225 casos activos, cando “hai menos dun mes eran 84. “Espero que isto se vaia frenando, porque hai que dicir que as medidas que se adoptaron están tendo un efecto realmente durísimo”, para o comercio de Santiago.
En canto ás restriccións, reiterou que “hai unha autoridade competente e o que aqui procede non é que cada un dea a súa opinión coa mellor das intencións, se non que a autoridade competente tome as medidas, e os que non temos esa competencia colaboremos e apliquemos esas medidas”. En liñas xerais, sinalou, en Santiago en Noiteboa e Nadal houbo un cumprimento “bo da normativa”.
O alcalde realizou estas declaracións, ao final do acto de entrega dos diplomas ao alumnado do obradoiro de emprego dual CREAS II, co que se realizou unha intervención de mellora medioambiental para a rexeneración do Monte Viso. Un acto ao que tamén asistiu a conselleira de Emprego e Igualdade, María Jesús Lorenzana.
A actuación consistiu na adecuación da zona para usos recreativos nun entorno comunal apto para a práctica de deportes ao aire libre e de observación da natureza. Así mesmo, procurouse a rexeneración da vexetación autóctona mediante a implantación de especies propias e a recuperación da cuberta arbórea co obxectivo de repoboar o monte e dotalo de diversidade vexetal. Os traballos tamén permitiron mellorar a conectividade da senda peonil que percorre o monte Viso e remataron co acondicionamento dunha superficie para estacionar vehículos e dunha zona de lecer, previa á subida ao monte. Este espazo, recuperado para a veciñanza e os visitantes, sitúase ao leste da cidade, a carón da AP 9 ( P. K. 69, sentido decrecente) e fronte á Cidade da Cultura.
Coa intervención acondicionáronse 4.700 metros de sendas peonís, plantáronse 450 frondosas e 12.000 m2 de céspede, construíronse 300 metros de muro e procedeuse ao desbozado de 18 hectáreas de matorral, así como ao apeo de 350 eucaliptos e á retirada de 100 metros cúbicos de entullos.
Recibe no teu mail cada semana un resumo das novidades no PSdeG Santiago de Compostela