• O alcalde amosouse decidido a construír “o gran Santiago” para o que pide un voto “útil, sensato e centrado”.
• Reivindicou o seu modelo de cidade que pasa por construír o “gran Santiago” fronte a un Partido Popular que só pensa en “destruír”: “nunca houbo en ningún partido un candidato que fixera propostas tan absurdas como o señor Verea”

Santiago de Compostela, 26 de maio de 2023. Na Praza Roxa, en pleno corazón do Ensanche, o alcalde pechou a campaña das municipais apelando ao voto “útil, sensato e centrado” pensado en “gobernar e non en bloquear”: “pido a todos os que dubidan que fagan que o seu voto goberne; que me axuden a gobernar en solitario, que os seus votos non sirvan para bloquear Santiago”.

“Non se trata de elixir entre o PSOE e o PP, tratase de elixir o Santiago que queremos, e quen pode construír mellor ese Santiago” reivindicou o alcalde que insistiu en que nestas eleccións os votos poden servir para “gobernar ou bloquear, para construír ou para destruír”, presentando o seu proxecto como o único capaz de facer o “Gran Santiago que a xente nos demanda”.

E ese “gran Santiago” que Sánchez Bugallo está decidido a construír pasa por “coser  a cidade cos barrios, completar un modelo de mobilidade para o novo século, relanzar a construción de vivendas, crear oportunidades para os máis novos e deseñar novos modelos de vida para uns maiores activos”.

“Construiremos 10.100 vivendas, 8.000 delas a prezo taxado” co impulso do Ensanche norte, explicou o alcalde que reiterou a súa decisión de recuperar Emuvissa para desenvolver os polígonos de A Pulleira, Amio, Cancelas e Mallou. Ademais, en políticas de conciliación “faremos que todos os nenos de Santiago que cumpran 14 anos teñan unha bolsa para estudar inglés no estranxeiro”, tamén para facilitar a conciliación dos pais e nais xa anunciou a creación dunha nova ludoteca en Santa Marta.

Unha cidade “moderna, sen barreiras e peonil” é a que Sánchez Bugallo seguirá construíndo a partir do 28 de maio, con “transporte a demanda para que todo o mundo teña transporte ao carón da súa casa”, con solucións mecanizadas para “promover a mobilidade peonil” e con aparcadoiros máis económicos, “con prezos públicos para os residentes de Compostela”.

“Fomos quen de crer e de crear, de protexer as familias e de relanzar a actividade económica”

Coa “enorme satisfacción” que supón que Santiago sexa unha das cidades de España que mellor se recuperou da crise, Sánchez Bugallo recalcou que durante este mandato conseguiuse relanzar a actividade económica logo da crise sanitaria, social e económica: “somos a cidade que máis pronto está a ter mellores indicadores que antes da pandemia”.

“Santiago é a cidade de Galicia onde hai mellores postos de traballo, mellores rendas, mais viaxeiros, onde se implantaron mais empresas, no que se incorporaron máis emprendedores ao comercio” recalcou o alcalde.

“Temos unha cidade para soñar e para vivir, e queremos seguir téndoa”

Sánchez Bugallo concluíu o seu discurso chamando a votar “por Santiago” e en contra “das tuneladoras”: “votar pola cidade histórica e polos barrios, polo rural, polos Ensanches, a votar polos que queren crer e crecer en Compostela”. Uns votos que, segundo o alcalde, “construirán o Gran Santiago que queremos”.

“Nós queremos construír, e o PP de Verea está empeñado en derrubar; en derrubar o patrimonio histórico, derrubar a casa da xuventude e derrubar as vivendas familiares da cidade histórica para entregarllas ao mercado turístico” criticou Bugallo.