• O desenvolvemento de catro polígonos de vivendas no ‘Ensanche norte’ permitirá que unas 30.000 persoas se asenten en Compostela, nunha zona estratéxica ao carón dos polígonos industriais
• “O noso obxectivo é comezar pola Pulleira e desenvolver os plans parciais dos outros tres polígonos” explicou o alcalde, que insistiu na necesidade de recuperar Emuvissa, a empresa pública de vivenda e solo, para promover o solo.

Santiago de Compostela, 19 de maio de 2023. Catro polígonos de vivenda, son os que proxecta o Plan Xeral e que Sánchez Bugallo está decidido a impulsar coa recuperación da empresa pública de vivenda e solo: “isto permitiranos que unhas 30.000 persoas habiten a zona norte de Santiago, nun lugar estratéxico ao carón dos polígonos industriais e cubrindo todas as demandas de vivenda durante esta década e a próxima”.

Comezando polo polígono da Pulleira, os seguintes serán Cancelas, Amio e Mallou. En total se trata de 130 hectáreas de zona residencial, das que un 30%, 40 hectáreas, se reservarán para espazos verdes, permitindo a construción de máis de 10.000 vivendas, 8.000 delas a prezos tasados.

“O noso obxectivo é comezar pola Pulleira e desenvolver e recuperar os outros plans parciais, elaboralos e aprobalos” explicou o alcalde recalcando que este é un plan de traballo “de 12 anos” para desenvolver o Ensanche norte e “satisfacer as necesidades de vivenda de Santiago de toda a próxima década”.

E é que a Pulleira conta xa cun Plan Parcial aprobado, feito pola antiga Emuvissa: “tamén os outros tres plans parciais estaban feitos, pero o Partido Popular decidiu metelos nun caixón” explicou o alcalde, asegurando que agora é o momento de “retomalos e reelaboralos coas modificacións lexislativas destes catro anos”.

“A nova ampliación de Santiago, o gran Santiago que plantexamos permitirá que unhas 30.000 persoas habiten a zona norte de Santiago”

A Pulleira, contando xa co Plan Parcial aprobado, é un polígono dunhas 30 hectáreas de extensión con capacidade de 2.200 vivendas das que, 1.800, estarán acollidas a réxime de protección. O de Mallou é o máis amplo con 37 hectáreas e capacidade de ata 3.500 vivendas. Outras 1.900 se ubicarán no polígono de As Cancelas e 2.500 máis en Amio.

“O gran reto que temos que abordar é o residencial” explica o alcalde que sinala dúas grandes prioridades que deben ser asumidas por calquera concello: a xeración de emprego e a busca de alternativas de vivenda. “Coa primeira xa abordada e uns resultados razonablemente satisfactorios, agora é o momento de dar o salto en materia de vivenda”.

Atraer, reter e fixar poboación

Santiago é a cidade que máis reduciu o paro e cos mellores datos de emprego de Galicia. Con estas cifras, aínda que “temos que seguir traballando na ampliación de solo industrial e facilitando a implantación de empresas” con tres novos polígonos industriais xa proxectados, o alcalde fixa como prioridade “atraer, reter e fixar poboación”.

Unha parte desas cifras récord en materia laboral vai da man das 30.000 persoas que diariamente veñen a traballar a Santiago. Ofrecer unha alternativa de vivenda coa creación de novos polígonos é troncal para que “Santiago dea ese gran salto e siga medrando”.

A construción de nova vivenda, explicou o alcalde, debe ir acompañada dunha política de rehabilitación para vivenda habitual na cidade histórica e dunha integración da zona sur -Castileiriño, Conxo, Santa Marta…-  ‘cosendo’ a cidade: “mellorar a oferta de vivenda implica necesariamente xerar espazos que melloren a calidade de vida das veciñas e veciños de Santiago, facendo que Compostela medre ao tempo que o fai de forma compacta, integrando os barrios e conectando o rural, construíndo un gran Santiago”.