O alcalde de  Santiago, Xosé Sánchez Bugallo destacou hoxe o esforzo do Concello de Santiago, que destinou, desde que comezou a pandemia, aproximadamente nove millóns de euros a axudas para a reactivación económica dos sectores comercial, hosteleiro e cultural, das que se beneficiaron máis de mil empresas. Unhas axudas que sinala, incidiron nos datos positivos de emprego.  O desemprego reduciuse nun 24% respecto do mismo mes de 2020; e nun 9% se se compara coas cifras de novembro de 2019. 

Das convocatorias de axudas de 2021 para o rescate dos sectores cultural, comercial, de restauración e hospedaxe e de turismo afectados pola crise da covid-19,  beneficiaranse 976 empresas de Santiago. Percibirán, un total de 3.986.597 euros. 

Esta cantidade únese, explicou Sánchez Bugallo, “as axudas anteriores” das convocatorias de 2020, por importe aproximado doutros tres millónes de euros. “Falamos uns sete millóns de euros en axudas directas a empresas do ámbito cultural, do ámbito do comercio e do ámbito da hostalería. Isto permitiu que máis de mil comercios e entidades hosteleiras se beneficiasen destas axudas; en algún caso en dúas ocasións”. É, engadiu, “a maior cantidade en axudas directas a comercio, hostalería e cultura, aportada polo concello en toda a súa historia”. 

O rexedor recordou que a Xunta de Goberno Local aprobou onte a  concesión, xustificación e pagamento das “Axudas para o rescate da restauración, hospedaxe e turismo do Concello de Santiago afectado pola crise da covid-19. Anualidade 2021”, da que se beneficiarán 463 empresas e negocios de hostalería e turismo, que percibirán 1.747.105 euros en total. 

As axudas ao comercio xa están pagadas. O 18 de outubro a  Xunta de Goberno Local aprobou a “Concesión, xustificación e pagamento das axudas para o rescate do comercio local afectado pola COVID 19. Anualidade 2021”, das que se beneficiaron 481 establecementos.  Suman, en total, 1.684.500 euros. Tamén están pagadas as axudas para actividades culturais do sector profesional. Estas axudas, por un importe de 554.992  euros, beneficiaron a 32 entidades culturais. 

A estes estas axudas directas cómpre sumar, explicou o alcalde, os Bonos Corazón Compostela. Fixéronse efectivos, ata o de agora, 18.197 bonos, cun gasto de compra de 1.349 890 euros. Hai un total de 20.000 bonos para descargar, e pódense utilizar ata o 10 de decembro. “Nas últimas tres semanas, o ritmo de consumo de bonos está por enriba dos 4.000 semanais, uns 300.000 euros semanais en gasto”. 

Con estes bonos comerciais, cos bonos de aparcamento e con outros outros convocatorias de axudas para a innovación e modernización dos negocios locais, a aportación do Concello ao tecido produtivo sitúase, segundo indicou Sánchez Bugallo “nos 9 millóns de euros”. “Una cifra da que nos debemos sentir satisfeitos, porque non ten parangón na nosa historia. E tampouco creo que existan moitas comparacións, nin a nivel de Galicia, nin de España. Poucos concellos hai que destinaran 100 euros por habitante a este tipo de axudas. Polo menos en Galicia ningún gobernado por algunha das siglas políticas que conforman a oposición municipal”.

O alcalde ten a seguridade de que estas cifras de axudas á reactivación económica están tendo incidencia na evolución do desemprego. “Temos 4.933 parados. Sigue sendo unha cifra que nos parece excesiva, que contrasta coas dificultades para atopar traballadores en determinados sectores, como a construción e a hostalería”. Son, recordou, 1.579 desempregados menos que en novembro do ano pasado, no que se rexistraron 6.504 persoas desempregadas; e 494 menos que en novembro de 2019, no que se contabilizaron 5.427 persoas desempregadas. “Polo tanto cómpre dicir que o paro diminuiu en Santiago nun 9% se o comparamos co mesmo mes do ano 2019, antes da pandemia; e nun 24% se o comparamos co mes de novembro do ano pasado. Son cifras significativamente mellores que a media”, subliñou. 

Contaxios COVID

Por outra banda, o alcalde manifestou a súa intención de facer “o posible por “non cancelar nada” este Nadal, tendo en conta, engadiu que tanto a cabalgata de Reis como a festa de fin de ano na Praza do Obradoiro “son ao aire libre”. Non descartou que, ante o avance da pandemia, haxa que controlar aforos ou que se esixa o pasaporte covid para acceder á celebración de noite vella. 

Ante a subida de contaxios, o rexedor animou a vacinarse a aquelas persoas con reticencias, e a cumprir a normativa de seguridade para “evitar males maiores”. “Chegamos á ponte da Constitución cuns parámetros de casos activos bastante semellantes aos que tiñamos o ano pasado pola mesma data”. Recordou que o ano pasado, a partir desta data “se produciu un salto cualitativo no número de persoas afectadas polo virus, que acadou o seu tope a finais do mes de xaneiro”. 

Este ano, sinala, a situación é mellor, pola porcentaxe de persoas vacinadas, o 90% da poboación, fronte ao 10% que non se vacinou. Nembargantes, destacou, a porcentaxe nas UCIS é do 50% de persoas vacinadas e o 50% de persoas sen vacinar”, o que reflicte a incidencia da pandemia no colectivo que non se quixo vacinar.