O alcalde compostelá, Xosé Sánchez Bugallo, amosou a súa sorpresa de “que se utilice o Parlamento Galego para criticar a outras institucións e non para defender a Santiago, durante o debate dos orzamentos galegos”. Foi durante a comparecencia dos venres, na que demandou o apoio da cidadanía para o “Carballo de Conxo”, e animou a descargar os Bonos Corazón Compostela, emitidos polo concello de Santiago para apoiar o comercio e a hostalería local. 

En todo momento, o rexedor apoiou as manifestacións realizadas polo portavoz do Grupo Municipal Socialista, en Radio Galicia-Cadena Ser, en resposta as acusacións do PP de que o Goberno Central ten abandonada a Santiago. Guinarte explicou que as tres grandes obras que se están executando ou se van executar en Compostela, orbital, estación de tren e EDAR, están financiadas polo Executivo de Pedro Sánchez.  Sobre a reunión do Real Padroado recorda que é un órgano político integrado pola Xunta, o Goberno Central e o Concello de Santiago, e que estableceu, na reunión do 25 de xullo pasado, uns obxectivos a dez anos que agora hai que calendarizar. O concello, dixo, “xa está facendo os deberes” e recordou á Xunta que pode incorporar partidas para o Consorcio nos seus orzamentos, que agora se están debatendo no Parlamento de Galicia.  

“En lugar de discutir dos orzamentos galegos parece que se pretende que se mire para outro lado”, sinalou Sánchez Bugallo. O alcalde recordou que para estas tres actuacións, orbital, EDAR e estación de tren, “veñen, de fondos do Estado”, 100 millóns de euros,  “unha cifra”, engadiu, que non é menor. 

Con relación aos Fondos Next Generation, destacou que “en todas as convocatorias ás que nos estamos presentando, Santiago está tendo un éxito importante”. Explicou que hai convocatorias ás que o Concello se presenta directamente, e a outras faino en colaboración co Consorcio. A última convocatoria á que se presentou o concello é unha proposta para a rehabilitación do Pazo de Raxoi, en colaboración co Consorcio. Hai preconcedida, adiantou, unha cantidade de tres millóns de euros apra esta actuación. 

 “En todas as convocatorias ás que nos estamos presentando, Santiago está a ter éxito”, indicou, para a continuacón engadir que Santiago ocupa o posto número 20 entre ás máis de cen solicitudes de toda España para optar ás subvencións da Axenda Urbana.  “Hai moitas posibilidades de ver as necesidades satisfeitas, vía concello ou vía Consorcio”, aseguro, pondo como exemplo o proxecto de reparto de mercadorías na Cidade Histórica, que se xestionaría xunto ao Consorcio, ou o do aparcadoiro periférico de Meixonfrío, que “en principio” xestionaría só o Concello.

Carballo de Conxo

O alcalde de Santiago, Xosé Sánchez Bugallo, solicitou a colaboración da cidadanía para darlle un novo impulso á candidatura do “Carballo de Conxo” como árbore europea do ano. O rexedor destacou que a pesares de ir en primeiro lugar, con 17.131 votos, estase acercando cada vez máis a “Sabina de Blancas”, de Teruel, que conta co respaldo do Goberno de Aragón. 

De onte a hoxe incrementouse en mil o número de votos da Sabina, indicou, e “só en 400 os que apiaron o Carballo de Conxo”. A votación finaliza o 20 de novembro. “Quedan 8 días decisivos”, continuou. “Sería terrible que nesa recta final, nos pasasen por diante”. Por iso pediu á cidadanía que fixese un último esforzo, “porque sen quitarlle méritos á Sabina, non ten a historia do Carballo de Conxo, nin pode trasladar a mensaxe que traslada este carballo, que sobreviviu a tantas circunstancias adversas: un exemplo marabilloso da Galicia que somos e da que queremos ser”. Para apoiar á arbore presentada polo concello de Santiago, hai que votar desde a web https://arboleuropeo.es/

Comercio

O rexedor tamén destacou o impulso experimentado esta semana polos Bonos Corazón Compostela. O número de bonos comerciais retirados ata hoxe é de 7.392. A metade, indicou “aproximadamente 3.700, retiráronse esta semana. Isto quere dicir que empezan a coller velocidade e estamos esperanzados”. Pero tamén é certo, continuou “que aínda quedan moitos bonos por descargar”, polo que anima á cidadanía a utilizalos tanto nos comercios de Compostela, como en locais de restauración e hostalería. 

En total, puxéronse en circulación 20.000 bonos, por importe de 75, 50 e 30 euros, que se poden descargar da páxina ttps://bonoscorazoncompostela.gal/, O prazo para gastalos remata o 10 de decembro. 

Na rolda de prensa de hoxe, tamén se informou sobre  Talentia Summit. A súa web https://www.talentiasummit.com/ comezou a inscrición en ofertas de emprego, videochamadas con empresas, cursos de formación, certificacións oficiais e webinars entre moitas outras actividades e xa rexistrou máis de 2.000 inscricións e actividades e 10.000 usuarios nas primeiras 24 horas dende a súa apertura.