O alcalde de Santiago, Xosé Sánchez Bugallo cualifica de “dato preocupante” a evolución dos contaxios por COVID19 na cidade de Santiago. Hoxe hai un total de 298 casos activos, fronte aos 272 de onte, cifra que, segundo o rexedor, “probablemente seguirá aumentando ata mediados de mes”. Por iso cre que cómpre adoptar novas medidas, aínda que advirte que o peche perimetral de Santiago, á marxe doutros concellos limítrofes, revelouse ineficaz.  

Sánchez Bugallo dá por feito que despois da reunión do Comité Clínico a Consellería de Sanidade adoptará máis restriccions, algo que ve “absolutamente xustificado”. Sinala que os contaxios durante a época de Nadal, fin de ano ou Reis “seguirán  aflorando nos próximos días”; e cre que se non se toman novas medidas, “é probable que o escenario sexa moito máis complicado ao longo deste mes de xaneiro”. Recorda o rexedor que “a terceira onda está aquí” e explica que non é raro que Santiago e Coruña sexan as primeiras cidades “onde se nota”, porque “son as que teñen maior nivel de interrelación e comunicación co resto de España e o resto do mundo, e a experiencia demostra que a mobilidade é un factor de transmisión, e de transmisión rápida do virus”. 

O rexedor elude pronunciarse sobre as distintas medidas que se poden adoptar, indicando que esa é unha decisión que corresponde aos expertos, pero desexa que sexan “as máis acertadas e eficaces para impedir o crecemento” da COVID19, “aló menos mentras non se poida xeralizar o tema das vacinas”. En relación ao peche perimetral asegura que, “o único que constato é que o resultado de pechar só Santiago foi moi duro para o comercio da cidade” e os datos “que temos en Ames, Teo, Brión, Oroso, Santa Comba e toda a contorna da área sanitaria”, non  confirman que haxa unha melloría nas cifras de contaxios. “Eses concellos”, engade, están en “termos relativos”, con datos peores dos que tiñan hai un mes, e con datos peores dos que ten Santiago”.  

Sánchez Bugallo volve apelar “á responsabilidade individual e colectiva de cada un de nós”, para evitar contaxios, “máis aló das medidas  que se dicten e máis aló do traballo que se poida facer desde as administracións”. Explica que onde existe un nivel de responsabilidade importante, como por exemplo, os centros escolares, a universidade ou os centros de traballo, rexístranse menos contaxios; e que os “maiores problemas estanse dando no  ámbito familiar e no ámbito de determinadas relacións sociais”, seguramente porque “non somos conscientes do risco que corremos ou non actuamos coa mesma responsabilidade”. 

Engade o rexedor que “todos os días hai denuncias por diferentes infraccións”, por incumprir o horario de toque de queda, por non levar máscara, por non cumprir o peche perimetral, etc. En canto ao tema de festas, recoñece que “houbo unha redución notable” de sancions que achaca, en parte, as vacacións universitarias.