• Tamén a planificación do espazo destinado ao CHUS, a estación de mercadorías e a promoción dun turismo sostible inclúense nestes 6 eixos estratéxicos
• O alcalde destacou o cumprimento do anterior pacto: “cos grandes proxectos da cidade moi avanzados como a intermodal ou o enlace Orbital e cun impulso sen precedentes en materia de industrialización”

Santiago de Compostela, 24 de maio de 2023. Son seis os “puntos clave de interese común” que o Foro Cívico fixa como prioritarios para o próximo mandato: vivenda, ciclo integral da auga, industrialización, estación de mercadorías, ordenación do CHUS e turismo. Uns “obxectivos compartidos” cos que se comprometeu esta mañá o alcalde, nunha firma na que participaron todas as forzas políticas con representación no Concello, e na que Sánchez Bugallo fixo balance das 5 prioridades que se fixaran hai 4 anos para o mandato que agora remata.

“A intermodal finalizarase no 2024, as obras do enlace Orbital coa AP-9 que dará servizo ao polígono de A Sionlla están xa moi avanzadas, o Orbitaliño está en proceso de resolución das alegacións presentadas polo Concello e, en materia de industrialización, o salto dado durante estes catro anos, non ten parangón” destacou o alcalde.

Dimensionamento e planificación do espazo destinado ao CHUS

“Temos que darlle perspectiva de futuro ao crecemento dun hospital, actualmente, ao borde do colapso” explicou o alcalde que, ademais de recalcar a necesidade de abordar a ampliación do aparcadoiro, “para o que xa puxemos a disposición da Xunta unha parcela que podería crear 400 prazas”, insistiu na necesidade de ampliar a parcela do hospital para “darlle perspectiva de futuro ao seu crecemento”.

Esta é a primeira das prioridades marcadas no acordo do Foro Cívico para o que o alcalde propón ampliar a parcela do CHUS co desenvolvemento do sector do solo urbanizable SUD 9-10 situado ao sur do complexo hospitalario da Choupana, “creando un entorno de calidade ambiental e integrar o Hospital no futuro parque arqueolóxico” acadando “unha grande calidade ambiental na súa integración urbana”.

Dar unha solución ao problema de falta de vivenda

Outro dos puntos cos que se comprometeu o alcalde esta mañá foi a dar unha solución ao problema da falta de vivenda, para o que Sánchez Bugallo explicou que se debe traballar en dúas direccións: rehabilitación e promoción de nova vivenda. Nese sentido, o alcalde recordou que se porán en marcha axudas de ata 80.000 euros para promover a rehabilitación na cidade vella, e se crearán novas Áreas de Rehabilitación Integral en diferentes barrios da cidade como se fixo con Pontepedriña ou Vite, por exemplo.

Ademais, o alcalde recalcou que coa recuperación da empresa pública de vivenda e solo se promoverá solo co impulso aos polígonos de vivenda da zona norte de Santiago: “o primeiro será a Pulleira, pero seguiremos con Amio, Mallou e Cancelas”. Trátase, explicou, dun plan de 12 anos co que se chegarían a construír 10.000 vivendas das que, 8.000 serán a prezo taxado.

A promoción dun turismo sostible e a industrialización son outras das prioridades marcadas no pacto firmado esta mañá. Precisamente, o alcalde recalcou que en materia industrial o reto agora é ampliar o solo industrial froito do éxito dos últimos anos e a construción da estación de mercadorías: “agora que a liña A Coruña-Vigo é de uso compartido entre viaxeiros e mercadorías temos a oportunidade de abrir esta estación de mercadorías”.

Un servizo que, tal e como explicou o alcalde, permitirá mellorar, máis aínda, a conexión da área empresarial do Tambre, a “maior e mellor situada de toda Galicia”: atravesada por unha autopista, unha autovía e unha estrada nacional”.

O novo contrato de auga “un servizo fundamental”

Outro dos eixos que presenta como prioridades o documento asinado polo Foro Cívico, a Cámara de Comercio e os representantes das forzas políticas é o novo contrato para o ciclo integral da auga. Un contrato que o candidato dos populares recoñeceu que era fundamental despois de telo bloqueado no pleno da corporación. Así o recoñeceu o alcalde que asegurou “coincidir” co candidato e amosouse á expectativa de que “se poida facer xustamente o que non se poido facer no mandato pasado”.

Sánchez Bugallo que concluíu se trata de “un bo punto de acordo” e, reivindicando o seu compromiso, confía en que “despois das eleccións poidamos traballar conxuntamente para facer realidade”.