Subscríbete ao noso boletín
Recibe no teu mail cada semana un resumo das novidades no PSdeG Santiago de Compostela
Santiago de Compostela, 13 de maio de 2023. Co obxectivo de “facilitar a conciliación das familias máis novas para que poidan traballar e coidar das súas crianzas” o alcalde, Sánchez Bugallo construirá unha nova ludoteca, que se sumará á de Fontiñas, para dar servizo á zona sur de Santiago.
Ubicada nunha parcela en Santa Marta, próxima ao novo centro deportivo, a vocación deste novo espazo é “ofrecer un servizo de conciliación durante todo o ano, os 365 días” creando “un amplísimo sistema para que, tamén as familias monoparentais, poidan combinar o traballo co coidado das súas fillas e fillos”. O Espazo de Lecer María Miramontes conta xa actualmente con máis de 430 familias usuarias.
Tamén en materia de conciliación, Sánchez Bugallo destacou o esforzo que se fixo nestes anos “e co que continuaremos” con programas en Semana Santa e durante o verán. “Tamén recuperamos o Nadal Xogo, que fora eliminado hai anos, e que nós queremos seguir reforzando”.
Así o anunciou o alcalde que esta mañá acompañou ás nenas e nenos da Escola Municipal de Música na andaina musical que están facendo con motivo da festa do Banquete de Conxo.
Aparcamento próximo aos centros
Sánchez Bugallo anunciou ademais que habilitará “prazas de aparcamento próximas aos centros da cidade para que as familias poidan deixar aos seus fillos comodamente na escola”.
Co obxectivo de ordenar o tráfico nas horas de entrada e saída do horario escolar nos centros, o alcalde aposta por un sistema como o que “xa puxemos en marcha no aparcadoiro de Praza de Galicia ou en Xoán XXIII, onde as familias contan con media hora gratuíta para aparcar nos parkings”.
700 nenas e nenos se benefician dun amplo sistema de becas
Becas comedor, becas libro e para actividades de apoio e extraescolares. Compostela conta actualmente cun “amplísimo sistema de becas” do que se benefician “arredor de 700 nenas e nenos” explicou o alcalde. Ademais “nas últimas convocatorias ampliouse o crédito para que ningunha familia quedara sen esta axuda” sendo “a primeira vez que a lista de agarda queda a cero”.
O alcalde destacou ademais que Compostela é “un dos poucos concellos de Galicia, apenas media docena, que actualmente xestiona os comedores escolares. Tamén, tirando de datos, puxo en valor que o número de prazas das que dispoñen as escolas infantís da nosa cidade “practicamente duplica” as recomendadas pola UE: “un importante activo para construír o gran Santiago que queremos desde as novas xeracións”.
Dar un salto en formación de inglés
“Queremos dar un salto na formación de inglés, e poremos en marcha un sistema de becas para viaxar ao estranxeiro de maneira que o 60% das nenas e nenos que cumpran 14 anos poidan estudar inglés fora” explicou o alcalde.
Tamén no marco dos programas de conciliación, Sánchez Bugallo, anuncia a recuperación da oferta dos cursos da Escola Municipal de Verán de Inglés.
Recibe no teu mail cada semana un resumo das novidades no PSdeG Santiago de Compostela