• O alcalde participou no debate impulsado polo Seminario de Futuros Urbanos na Facultade de Xeografía e Historia sobre o futuro da Casa da Xuventude e a Praza do Matadoiro
• “Non se pode destruír o equipamento público máis grande da cidade histórica sen ter alternativa” recalcou o alcalde.

Santiago de Compostela, 21 de abril de 2023. ¿Estamos en condicións de botar abaixo un equipamento público na cidade histórica sen ter ningunha alternativa? Era a pregunta coa que iniciaba o debate o alcalde que organizou o Seminario de Futuros Urbanos arredor do futuro da casa da xuventude. Sánchez Bugallo aposta por rehabilitar completamente un espazo “que recibimos en estado ruinoso”, dándolle unha nova vida facendo do antigo matadoiro un espazo de encontro social, de programación cultural e con espazo para a celebración de actos de e para a cidadanía.

O alcalde explicou que a súa proposta non é unha idea nin unha ocorrencia senón “un proxecto, que conta con financiación da Deputación e que mellorará a imaxe da praza ao tempo que dotará de vida social a contorna”. Concretamente dos 2.500 metros cadrados dos que conta a Casa da Xuventude, 196 serán para un auditorio que terá́ un aforo de 250 persoas; 250 metros para un coworking sobre novas tecnoloxías e o segundo andar, o cal será́ de titularidade municipal, estará ao servizo da cidadanía. Tamén se integrará no primeiro andar servizos da Deputación: “o feito de conservar certa actividade administrativa dálle vida tamén a cidade vella” recalcou Sánchez Bugallo.

“Nós cremos que a proposta á que chegamos despois de un ano negociando é unha solución que permite preservar este equipamento público e que obtén a financiación necesaria para facelo viable” explicou o alcalde, xa que o convenio aprobado pola Deputación da Coruña cos votos a favor do PSdeG, BNG e as mareas, establece será a propia Deputación a que financie a actuación nun 74% e o Concello o 26%, sendo esta a solución máis barata das que se presentan.

Entrada ao parque de Belvís

A proposta do alcalde para a que se abrirá un concurso de ideas “tal como nos pediu no seu día o Colexio de Arquitectos de Galicia”, prevé ademais unha entrada ao parque de Belvís ao carón do regato do Cancelón.

“A entrada principal ao parque de Belvís, tal como prevé o Plan Especial aprobado no 1997, tamén co apoio do BNG, prevé que sexa a través da antiga finca das monxas, onde actualmente se atopa o cancelón”. Porén, a apertura de esa entrada, que contemplará a rehabilitación do regato, virá acompañada da mellora doutros accesos como pola rúa da Tafona, así como a creación dun novo desde a rúa de San Pedro.

Sánchez Bugallo amosouse especialmente crítico cos que “querían tirar a casa” e que, finalmente,  “non foron quen de tiralo” e cos que “falaban de manter os usos da casa e agora queren tamén tirala abaixo” recordando que “ninguén, durante este mandato, pediu unha peseta para rehabilitar a casa da xuventude mentres nós estivemos negociando para obter a financiación que permita recuperar un equipamento público moi necesario na zona da cidade vella”.

En definitiva, a proposta que lidera Sánchez Bugallo, “ten financiamento, mantén o equipamento público e permite dotar dunha nova entrada ao parque de Belvís”.

O alcalde concluíu a súa intervención lembrando ao resto de candidatos que “antes de destruír, hai que pensar en como se substitúe e finánciase esa substitución”, e asegurando que non vía solucións nas súas propostas.