Subscríbete ao noso boletín
Recibe no teu mail cada semana un resumo das novidades no PSdeG Santiago de Compostela
O alcalde destacou que desenvolver este plan precisa “dun esforzo extraordinario”, xa que non é habitual, “este volume de contratación”, que atribuiu “as circunstancias nas que nos atopamos, coa gran maioría de contratos caducados ou a punto de caducar”. O obxectivo, apuntou Sánchez Bugallo, é chegar a final de ano con todos estes contratos licitados, a pesar da complexidade do proceso. O rexedor vinculou este primeiro plan de contratación co plan de reactivación económica do Concello. Todos estes programas de contratación van ofrecer, dixo, “moitas posibilidades de xerar emprego e de atraer investimento para a cidade”. Dous factores que cualificou de “moi positivos e moi necesarios no escenario económico no que estamos”. Todo esto, engadiu, “débenos permitir dar un salto cuantitativo e cualitativo na calidade de servizos de Santiago”.
No contexto actual de crise sanitaria ocasionada pola COVID-19 no que nos atopamos dende o pasado 14 de marzo, e que motivou a declaración do estado de alarma, fai que o Plan de Contratación se converta nunha ferramenta das moitas que, sen dúbida, sinala a concelleira Marta Abal, “deberán artellarse para conseguir minimizar ou aliviar o escenario económico previsible. Se nun escenario de máis estabilidade a contratación pública alcanza valores económicos próximos ao 20% do PIB anual, no escenario actual a contratación pública será fundamental nos plans e medidas que todas as administracións arbitren no futuro máis inmediato como instrumento clave para a reactivación económica e a xeración de emprego”.
Non obstante, engade Marta Abal, “tendo en conta que o Plan é un documento programático e de mera previsión en tanto que recolle datos de carácter estimativo e non vinculantes, e dado o contexto económico actual derivado da crise sanitaria, é probable que algunhas destas estimacións se vexan reforzadas ou moduladas, para adaptalas ás circunstancias que concorran en cada momento”.
Outra das finalidades deste plan, segundo explicou Marta Abal, é dar a coñecer, nun único documento, as necesidades institucionais que pretenden cubrirse mediante os contratos que se relacionan; xa que inclúe todos os contratos obxecto de licitación no exercicio 2020, tanto os licitados como os pendentes de licitar. A concelleira destacou que “isto é un exercicio de transparencia impresionante tanto para os grupos políticos como para a cidadanía”, porque, engadiu, “ver nun só documento toda a actividade contractual, que é a parte esencial fundamental dunha administración, é un cambio importante”
DATOS
Durante a súa intervención, Marta Abal deglosou os principais datos contidos no documento, aclarando que “o valor de cada contrato inclúe o orzamento total de licitación, xunto coas súas posibles prórrogas e modificación orzamentarias”. Especificou tamén que non inclúe o IVE,e que tampouco inclúe “contratos menores nen a previsión da actividade contractual das entidades públicas instrumentais do Concello”.
As cantidades estimadas e agregadas por concellarías que resultan son as seguintes:
-Alcaldía. 2 contratos por un valor de 403.669,00 euros.
-Concellaría de Políticas Sociais, Saúde, Medio Ambiente, Parques e Xardíns. 7 contratos por valor de 628.096.707,58 euros. Destaca o contrato de saneamento e abastecemento de auga, por 25 anos con prórrogas, que suma 452.500.000 euros; e o de residuos sólidos urbanos e limpeza viaria, por 114.027.864 euros.
-Concellaría de Economía, Facenda, Persoal, Contratación e Modernización da Administración Local. Son 45 contratos, por valor de 19.012.860,44 euros. A concelleira destacou o de Smartiago, por 3.928.252,93 euros, que sinalou, intentará licitalo antes de que remate este mes de xuño.
-Concellaría de Centros Socioculturais, Barrios e Obras. Son 14 contratos por valor de 9.393.623,73 euros.
-Concellaría de Urbanismo, Vivenda, Cidade Histórica e Acción Cultural. Suma 6 contratos por valor de 1.635.107,74 euros.
-Concellaría de Mobilidade, Seguridade Cidadá e Festas. Son 9 contratos que suman 122.330.143,17 euros. Destaca o contrato de Transporte urbano por 12 anos e un valor de 117.241.948, 28 euros.
-Concellaría de Educación, Mocidade, Igualdade e Políticas Lingüísticas. Son un total de 6 contratos por 8.559.842,64 euros.
-Concellaría de Deportes e Benestar Social. Suma 4 contratos por 1.500.180,68 euros.
-Concellaría de Medio Rural. Son un total de 20 contratos, que ascenden a 3.990.659,33 euros.
Durante a rolda de prensa, Marta Abal agradeceu a implicación dos distintos departamentos municipais neste plan e salientou o traballo que están levando a cabo.
Recibe no teu mail cada semana un resumo das novidades no PSdeG Santiago de Compostela