• Mercedes Rosón acusou a Sanmartín de “falta de valentía política” por delegar a resposta ao concelleiro de Urbanismo “ignorando que no artigo 108.1 do regulamento indícase que se pode interpelar a un membro do goberno concreto”

• Os socialistas sacaron adiante tamén no pleno unha proposición para que a taxa turística reverta na cidadanía de Santiago, esixíndolle á Xunta que o recadado o xestione o propio Concello

• O goberno recoñeceu ademais que houbo engano no anuncio de un millón de euros máis para o Servizo de Axuda no Fogar, “sen ningunha rectificación posterior”

Santiago de Compostela, 28 de setembro de 2023. A operación Peleteiro volveu ao debate político na sesión plenaria deste xoves na que os socialistas solicitaron unha interpelación á alcaldesa ante “unha falta de transparencia absoluta” logo de que o executivo de BNG e CA mantivera unha reunión coa propietaria da parcela. Unha comparecencia da alcaldesa que non se chegou a producir porque delegou as explicacións no seu edil de Urbanismo “ignorando que o regulamento do pleno establece no artigo 108.1 que se pode interpelar directamente a un membro do goberno concreto” denunciou a concelleira socialista, Mercedes Rosón que acosou a Sanmartín de “falta de valentía política”.

Rosón preguntou ao bipartito se estaba “satisfeito” co proxecto presentado pola propietaria da parcela, que recibiu por resposta un vago “non cabe falar de satisfacción ou insatisfacción” por parte do concelleiro responsable. Precisamente sobre ese proxecto, a que ocupara o cargo durante o mandato socialista asegurou que se lle caeu “a alma aos pes” cando tivo acceso a esa solicitude de licenza para un proxecto que, explica, “prima o espazo comercial e hoteleiro” fronte a proposta que levaron a pleno no pasado mandato “que potenciaba o uso residencial e apostaba polo espazo público”.

Sen ocultar indignación polo que semella “o futuro próximo do ensanche”, Rosón recalcou que o actual proxecto contempla unha superficie edificable de 23.823 metros cadrados, fronte os 19.900 da proposta dos socialistas: unha diferenza de case 4 mil metros cadrados menos. A superficie residencial é de tan só 5.566 metros cadrados, fronte os 15.500 da proposta dos socialistas e, desaparece a praza pública que contemplaba dito proxecto por unha “especie de rúa ou canellón que nin cumpre co desexo da veciñanza da República de Arxentina”.

“Fronte a dúas prantas comeciais, hoxe temos cinco; e fronte as 150 vivendas hoxe temos 41”

Mercedes Rosón quixo facer fincapé na comparativa “entre o que botaron ao lixo no pasado mandato nunha oposición desleal e o que hoxe teñen enriba da mesa”, ironizando en que este é “o legado da oposición da señora Sanmartín, a señora Rozas e o señor Verea” todo un “éxito na súa política municipal”.

Explica en que, fronte a dúas prantas comerciais que se contemplaban no proxecto que os socialistas levaron a pleno en decembro do pasado ano, “hoxe temos 5 plantas” algo que “seguro que o comercio de proximidade llo agradece”. Tamén no uso hoteleiro, que desaparecía no proxecto do PSOE hai un cambio, incorporando na proposta da propiedade case 40 apartamentos turísticos, algo que Rosón afeou ao BNG por ser, ironizaba, “moi acorde co seu discurso sobre o turismo”.

Fronte as 150 vivendas -das cales, 30 estarían reguladas a prezo taxado- que contemplaba o proxecto que Sánchez Bugallo defendeu no seu mandato, “hoxe temos 41 vivendas de luxo, libres, con piscina e zona de barbacoa, a mel dos grandes tenedores” criticou Rosón que asegurou que resultaba “curioso que a alcaldesa non xustifique en termos políticos” a súa xestión para “pasar dun proxecto residencial a un comercial”.

Rosón preguntou ademais por se “existía arrepentimento” por parte do bipartito logo de bloquear a operación para rehabilitar o inmoble no pasado mandato, ante o que a alcaldesa preferiu defenderse alegando que “nada arranxa o mirar atrás” logo de que o seu edil asegurase que “non é competencia deste goberno avaliar o proxecto presentado”.

Sae adiante a proposición para esixir á Xunta que a taxa turística reverta en Santiago

Outra das cuestións que os socialistas levaron ao pleno foi unha proposición para que a taxa turística non fora destinada -ou non na súa totalidade- á creación dun Fondo para a Promoción do Turismo de Galicia que xestionaría a Xunta de Galicia. Sindo Guinarte recalcou que o lóxico sería que “o aproveitamento económico repercuta nos concellos que decidan implantala”.

“Non sería lóxico que os fondos non fosen destinados a eses ámbitos que decidan a súa implantación e que, ao mesmo tempo, son os que teñen máis necesidades de facer fronte a sobrecustos” explicou o edil socialista que afeou ademais ao Partido Popular que non supere o debate da taxa “como si fan o resto de países europeos”: “amento que o PP estea nese bucle de contrapoñer modelo de cidade a taxa turística como se fosen cuestións que non poden ir paralelas”.

O goberno ten que recoñecer  que “errou” ao anunciar un millón de euros máis para o Servizo de Axuda no Fogar

Foi logo dunha pregunta polo Grupo Municipal Socialista cando o goberno tivo que recoñecer o “erro documental” que cometeu ao anunciar un millón de euros extra para o SAF. A edil socialista Marta Álvarez afeoulles que a aclaración chegue “por unha iniciativa do PSdeG” e “non de motu proprio cando se esforzan en erixirse como o goberno da transparencia”: “pensamos que o máis congruente sería que cando se da unha noticia deste tipo saíse unha aclaración”.

Álvarez fixo fincapé en que “estamos a falar dunha cantidade moi importante que pode incrementar as expectativas dos usuarios, das familias ou do propio persoal do servizo”, afeándolle ao bipartito que “estas explicacións non tiveran lugar antes”.

E é que, o 21 de agosto anunciaron, logo dunha Xunta de Goberno, que se ía destinar un millón de euros máis ao servizo por un incremento de horas. Isto cando xa no orzamento do goberno socialista contemplárase unha subida de 600.000 euros en horas complementarias e, tendo en conta ademais, que no goberno socialista o contrato “xa alcanzara o límite máximo de custo permitido por lei” que establece ese tope nun 20% máis respecto o custo inicial.