• Consideran insuficientes as explicacións dadas ata o de agora dun “goberno que dicía ser o da transparencia”

• En maio, a propiedade da parcela presentou unha solicitude de licenza no Concello para a creación dun gran centro comercial, hotel e apenas 40 vivendas, como contempla o actual Plan Xeral

Santiago de Compostela, 11 de setembro de 2023.  Os socialistas esixirán explicacións no próximo pleno ante o “ocultismo” do bipartito sobre o estado da ‘operación Peleteiro’. Precisamente sinalan que a ausencia de explicacións son o “máis claro síntoma” de que “o que ían ser vivendas e unha gran praza pública, con xardíns, centro de día e centro sociocultural; rematará sendo un enorme centro comercial e un hotel, conxestionando o tráfico no Ensanche, arrasando co comercio local e eliminando a posibilidade de crear máis espazos públicos”.

O portavoz do PSdeG en Raxoi endureceu hoxe o ton ante unhas explicacións “insuficientes para un goberno que dicía ser o da transparencia”. Gonzalo Muíños insiste en que “a cidadanía ten o dereito de saber que é o que se está argallando para unha parcela que prometía ser un elemento de revitalización do Ensanche”.

E é que en maio, a propiedade da parcela presentou unha solicitude de licenza no Concello, depositando ademais arredor de medio millón de euros para o pago de taxas, coa que podería construír un gran centro comercial, con hotel e apenas 40 vivendas, que é o que contempla o actual Plan Xeral.

Precisamente en decembro do pasado ano os socialistas levaran a pleno unha modificación do PXOM para cambiar os usos, reducir a volumetría -baixando a altura do edificio e incrementando os espazos públicos dando lugar a unha gran praza de uso comunitario- e impulsar o carácter residencial reservando un 20% das vivendas para a súa venta a prezo taxado.  Unha modificación que BNG, Compostela Aberta e Partido Popular bloquearon “por intereses partidistas”.

“Dixo a señora Sanmartín na súa toma de posesión que este ía ser o goberno da transparencia, e o será, moi ao seu pesar, aínda que sexa a través de interpelacións plenarias ante o secretismo co que está actuando neste tema” censurou Muíños.