Subscríbete ao noso boletín
Recibe no teu mail cada semana un resumo das novidades no PSdeG Santiago de Compostela
O alcalde de Santiago, Xosé Sánchez Bugallo reitera que o consenso é imprescindible para sacar adiante o proxecto Peleteiro. Recoñece que neste tema hai pluralidade de opinións, pero apela á “responsabilidade” de todas as partes para sacar adiante esta operación urbanística, especialmente aos 25 concelleiros que conforman a corporación municipal. O rexedor non ve razoable “seguir mirando para atrás”, e pide que as decisións que se adopten só estean condicionadas “polo que consideremos mellor para a cidadanía”, cunha perspectiva de futuro.
O alcalde sinala que a proposta que avala o goberno municipal, redactada polos técnicos “que fixeron un traballo excelente”, reúne as tres condicións imprescindibles que debe ter o proxecto: “é dunha gran calidade”, ofrece seguridade xurídica, e ten o respaldo da propiedade”.
O rexedor explicou que o PXOM (Plan Xeral de Ordenación Municipal) en vigor, prevé o que estaba previsto en 2003: 23.500 metros cadrados de edificabilidade, “dos cales un máximo de 12.000 se destinarían a usos comerciais; 7.000 a uso hoteleiro; e un máximo de 4.500 a residencial, cunha praza pública de 1.395 metros cadrados, e un dotacional público de 900 metros cadrados.
Para o alcalde, o proxecto Peleteiro “é un tema troncal”, moi importante para o Ensanche e para conxunto da cidade. Recordou que esta operación ven desde o ano 2003 cando “foi aprobado por unanimidade o convenio e o Plan Especial que desenvolveu a área de Peleteiro”. Sánchez Bugallo recordou que “esta operación non prosperou nos termos previstos, primeiro porque houbo un recurso duns veciños da Rúa da Rosa que a suspendeu; e unha vez que se recuperou de novo no PXOM, aprobado en outubro de 2008” veu a crise económica, “que levou a unha paralización de actuación”.
O alcalde sinala que desde 2003, “as circunstancias cambiaron, e as demandas son diferentes”. Neste momento, sinala, “non existe consenso no referente á ordenación que se propón”. Explica Sánchez Bugallo, que “tal e como coñecen os grupos municipais, e as asociacións que forman parte da Comisión Mixta” , para o goberno municipal son imprescindibles tres condicións.
Estas tres condicións son, segundo enumerou Sánchez Bugallo, a calidade da actuación, “sabendo que é unha actuación que vai quedar para os próximos 50 ou 60 anos, polo que é moi importante que as decisións que se tomen se tomen pensando non só no que vemos hoxe, se non no que pensamos que pode pasar dentro de 10, 20 ou 30 anos”; a seguridade xurídica, “non queremos que volva pasar o de 2003 e que quede suspendida a actuación polo xulgado, xerando unha nova frustración colectiva”; e o acordo coa propiedade, “xa que sin ela a operación é imposible. Porque a propiedade, dacordo co plan actual, se non está dacordo cos cambios que se poidan introducir, pode pedir licenza para facer o que está previsto, e a licenza é un acto reglado. Polo tanto ese acordo é imprescindible”.
Para o alcalde, hai temas que non son obxecto de discusión; “un aparcamento como mínimo de 400 prazas, o que está no PXOM e o que figura en todas as propostas que se presentaron ata o de agora”; o dotacional público de 900 metros cadrados, “onde hai un consenso en que se destine a centro de día”; e unha praza pública de 1.395 metros cadrados.
A discrepancia, subliña Sánchez Bugallo, é a orientación da praza. “É unha discusión importante. Hai propostas, sobre todo do sector do comercio que piden a orientación cara República Arxentina”, porque lles pode vir mellor desde o punto de vista comercial. Unha posición continúa, que “probablemente sexa compartida polas comunidades veciñais” de esa rúa. “Pero é posible que os veciños de San Pedro de Mezonzo, e a veciñanza do edificio que fai esquina entre as dúas rúas, non compartan esa opinión, tal e como fixeron público no pasado pleno; e non sabemos a posición dos veciños da Rosa, que foron os que conseguiron a suspensión do plan do 2003, precisamente polos problemas de luces que lles plantexaba, entre outras circunstancias”.
Para o goberno municipal, segundo explica o rexedor, “necesitamos unha praza que sexa un espazo urbano útil, cómodo e o máis agradable posible, porque vai ser o principal centro de dinamización e actividades do Ensanche”. Nese sentido, continúa “temos que valorar se é preferible unha praza orientada ao sur ou sur-oeste, con sol e con luz, ou unha praza orientada cara o norte, con menos luz, menos sol, e máis humidade”. “Cando cambiamos”, continúa, “o obxectivo da actuación que pasa de comercial a residencial, non podemos esquecer que o decreto de normas de hábitat, en vigor en Galicia, recolle que as vivendas se orienten preferentemente en dirección ao sol e non en dirección ao norte”.
Tamén incide noutro aspecto importante, as medianeiras. “A proposta que elaboraron os técnicos municipais, que acepta a propiedade, é que a praza estea orientada cara San Pedro de Mezonzo”, cunha rúa que a conecte cara República Arxentina, con dúas edificacións a un lado e a outro, que tapan esas medianeiras”, continúa o rexedor.
Para o alcalde, “todos podemos ter as nosas opinións. Pero aparte das opinións hai intereses e responsabilidades, e non todos temos intereses, e non todos temos as mesmas responsabilidades. Como é lóxico, as opinións dos que teñen intereses, soen coincidir cos seus intereses, e é moi respectable”. Pero a responsabilidade principal témola 25 concelleiros, porque se precisan 13 votos” para sacar adiante o proxecto.
O alcalde una vez máis, volve apelar a un acordo: “non sei se será posible reconstruir o consenso que deu lugar en 2003 a aprobación daquel convenio e daquel Plan especial. Oxalá sexa así”.
Neste momento, hai dous escenarios posibles: “que todo siga como está. Non sería unha novidade. Serían catro anos perdidos”, como foron os oito anos anteriores, cos mandatos de Compostela Aberta e do PP. “Sería unha mágoa, algo que teríamos que valorar dun xeito negativo”. O outro escenario é escoller “o que consideremos o mellor” para o Ensanche e para a cidade, “ainda que non nos poñamos todos dacordo. En calquera caso, engade Sánchez Bugallo “é unha responsabilidade que temos que compartir entre todos os grupos políticos”.
Afirma o alcalde que “nós asumimos e imos seguir asumindo a nosa responsabilidade; e imos seguir esforzándonos en intentar buscar o mellor acordo e consenso posible. O que non é razonable é seguir mirando para atrás, xa que non nos leva a ningunha parte. O mellor é que todos miremos para adiante, e que cada un desde o seu punto de vista, antepoñamos os interese xerais a calquera outro tipo de consideración”.
O alcalde anunciou unha próxima reunión da Comisión Mixta, “se nos da tempo a semana que ven, cando teñamos articulada esta proposta con esa apertura desde República Arxentina. Para o rexedor, sería necesario ter unha decisión tomada antes das vacacións.
Nova estación de tren
Na rolda de prensa dos venres, o alcalde tamén anunciou a presentación pública do proxecto da nova estación de tren de Santiago de Compostela, que acaba de saír a licitación por 27,75 millóns de euros. Sería o próximo día 18, “contando ca presenza da presidenta de Adif, Isabel Pardo de Vera, e do arquitecto autor do proxecto, Juan Herreros”.
O alcalde amosou a súa satisfación polo avance, “nun tema que nos houbese gustado ter resolto antes, pero a pesares de todo, e dos pasos atrás que se foron dando”, hoxe vislúmbrase a saida. Recorda que está incluido nos orzamentos do estado para 2021 e publicado no Diario Oficial das Comunidades Europeas, “e agora en canto saia publicado no BOE abrirase o prazo de presentación de ofertas. O obxectivo sería que a obra quede adxudicada este ano, empeza a finais deste ano ou principios do próximo e se remate cara mediados do ano 2024”, engadiu o rexedor.
Sentenza
Sobre a sentenza firme, “xa definitiva, do antigo hospital de Galeras”, o alcalde sinalou que espera que esta operación empece a saír adiante, “unha vez clarificado o escenario legal”. “Esperamos que a USC e o promotor que foi adxudicatario pola universidade, desenvolvan esa operación, porque a imaxe que da ese edificio é bastante penosa. É unha zona moi singular e moi importante da cidade, cun edificio que non pode seguir nas condicións nas que está”.
O alcalde espera recibir, “canto antes”, a petición de licenza para poder empezar as actuacións”.
Comercio
Sánchez Bugallo amosouse “moi satisfeito coa acollida de público “que está tendo Prima 21, a festa do comercio que se inaugurou onte e que se desenvolverá ata mañá sábado co obxectivo de dinamizar o sector.
O alcalde destacou que esta campaña, que se prolongará durante a fin de semana, é “moi importante” para la zona vella, pero “sobre todo para o Ensanche”, polo que o concello intentará programar novas actividades o próximo fin de semana, “co obxectivo de darlle continuidade”.
O alcalde tamén deu datos sobre a última convocatoria de axudas directas destinadas aos sectores máis afectados pola crise económica derivada da COVID. Recibíronse máis de mil solicitudes, 524 solicitudes de comercio, e 601 de hostalería e turismo.
Aínda que Sánchez Bugallo expresou o seu desexo de atender todas as demandas, a ampliación dos límites das contías respecto das subvencións de decembro, ata 5.000 euros por solicitude para comercio, e ata 4.000 euros para hostalería, “limitan os recursos dispoñibles”, sinalou.
Esta terceira convocatoria de axudas para o sector comercial ascende a 1,7 millóns de euros; mentras que as destinadas a hostalería e turismo suman 1,9 millóns de euros.
É a maior cuantía en axudas para apoiar os sectores económicos en crise, na historia do concello de Santiago, e unha das maiores de España, se temos en conta os orzamentos e a porcentaxe de poboación.
Turismo
Por outra banda, Sánchez Bugallo valorou de xeito positivo os datos das reservas turísticas previstas para os próximos meses, sinalando que Santiago está “nun proceso de recuperación que vai continuar”. “As cifras indican que as reservas van subindo segundo avanza o ano: dos datos de setembro e outubro son maiores que os de agosto e xullo, e a súa vez maiores que os de xuño”, indicou.
Respecto á reactivación do turismo, o alcalde agradeceu o “espaldarazo” ofrecido pola Casa Real, coa súa visita á Compostela este xoves, e coa súa presenza o 25 de xullo, día de Galicia, na ofrenda ao Apóstolo.
Recibe no teu mail cada semana un resumo das novidades no PSdeG Santiago de Compostela