O alcalde de Santiago de Compostela, Xosé Sánchez Bugallo, é o novo presidente do PSOE provincial da Coruña, que dirixirá o novo secretario xeral, Bernardo Fernández. Aprobouse hoxe no IX Congreso Provincial, co 95,24% dos apoios.

Ademais, a candidatura ao comité provincial, no que estará a deputada autonómica Noa Díaz , que foi rival de Bernardo Fernández nas primarias, rcibiu un 96,1% dos votos. Pola súa banda, Sánchez Bugallo, tamén será o representante da provincia no Comité Federal, unha candidatura que recibiu o 82,25% dos votos. Por último, Margarita Igrexas presidirá a comisión de ética, que recibiu o 81,22 dos apoios.

Na clausura, o secretario xeral do PSdeG, Valentín González Formoso, asumiu o reto de chegar á Xunta de Galicia para “devolverlle a ilusión a Galicia e pasar páxina dun Feijóo máis preocupado de facer seguidismo de Ayuso, Casado, Mañueco e Ejea” que de defender a Galicia. Así o dixo na súa intervención na clausura do 4º Congreso do PSdeG de Coruña, no que deu o relevo á fronte da secretaría xeral a Bernardo Fernández e á nova executiva, ratificada co 95,24 por cento dos votos.

González Formoso chamou a relevar ao presidente da Xunta “por inoperancia” logo de constatar a súa “renuncia á defensa dos intereses dos galegos e das galegas para ser oposición ao goberno do Estado en lugar de ser presidente do noso país”. Sinalou así a súa estratexia de “poñer paus nas rodas” da reforma laboral, da actualización das pensións, a Lei de FP ou entorpecer os bonos de alugueiro para os mozos e mozas.

Resumiu que o presidente da Xunta quere “poñerlle paus nas rodas ao avance do país”, nas antípodas do proxecto socialista “que representa a ilusión, un partido que anhela soñar Galicia, recuperar o espírito dun país que necesita reinventarse, revolucionarse tranquilamente e soñar un país aberto”.

Avogou por unha Galicia na que “ningún xubilado teña que preocuparse de se terá pensión no seu futuro, e ningún pai ou nai teña medo polo futuro polos seus fillos e se terán que irse alén das nosas fronteiras”. Sinalou que “se Einstein nace en Mañón ou Rosalin Franklin nace en A Guarda terán a oportunidade de soñar Galicia e facer mellor este país”.

O líder dos socialistas galego augurou o “rexurdir do PSdeG”, porque “parecémonos a este país máis que ningunha outra formación”, unha Galicia que “ten espírito propio, non ten apelidos nin pertence a ningunha formación política”. Defendeu “un pobo libre, orgulloso do pasado e que non renuncia ao futuro, que non quere á dereita conservadora nin ao trasnoitado nacionalista”.

González Formoso criticou un PP no que “todo vale”, en alusión ao “espectáculo” do conflito entre Casado e Ayuso, demostrando que “váleslle arrasar, espiar, comprar vontades, as peores prácticas da política, que en realidade son prácticas mafiosas incorporadas á política”. Chamou a “non permitir” estas prácticas que en realidade “danlle unha oportunidade ás formacións de extrema dereita e ao populismo”.

Imaxe de arquivo do alcalde de Santiago

O responsable socialista interveu no peche do Congreso que comezou cun recordo ás vítimas do sinistro do pesqueiro Villa de Pitanxo e do mundo mariñeiro e “é Galicia en esencia”, do que viven máis de 30.000 familias de Galicia. Reivindicou a solidariedade “non só nestes días, senón que estaremos con estas familias cando xa ninguén se acorde delas”.