O alcalde de Santiago, Xosé Sánchez Bugallo, avanzou hoxe que “en principio está pre-adxudicada” a construción da nova terminal de viaxeiros da estación de tren de Santiago, á UTE formada por COPASA e Taboada y Ramos, “dúas empresas de Galicia”, segundo destacou o rexedor. Neste momento, indicou, “estamos pendentes de que se formalicen os contratos e que, polo tanto, poidan inciarse as obras, segundo “o programa previsto”. 

Sobre o debate aberto en relación ás prazas de aparcamento no CHUS, sinalou que a opción de ampliación do hospital é, neste momento, a mellor opción, con vantaxas a nivel económico, xa que diminúe os custes”; e de organización e racionalización na prestación do servizo, “ao ser no mesmo espazo”. Pero, recoñece, tamén ten desvantaxes, xa que, sinala, se verían agravados os problemas de circulación; “salvo que se actúe de forma decidida tanto na ordenación do estacionamento no interior do recinto, como habilitando outras fórmulas que permitan aumentar o número de prazas”. 

O alcalde rematou sinalando que, neste tema “temos que elixir”, e o principal “é priorizar o servizo de atención á saúde, inda que iso implique sacrificar outras cousas”. E que cómpre pór en valor “os elementos positivos e vantaxas que ofrece un hospital dentro da cidade”, apostando polo transporte público e os accesos peonís; e procurando que, na medida do posible “o acceso en vehículo privado estea organizado”, priorizando o acceso daqueles pacientes que máis o precisan.  

Por outra banda, o alcalde censurou a actuación do condutor que na madrugada do sábado ao domingo; atropelou a un mozo na zona do Ensanche e posteriormente deuse á fuga. Sánchez Bugallo cualificou o seu comportamento de  “enorme estupidez e irresponsabilidade”, e amosouse preocupado pola vítima, á que lle desexou unha pronta recuperación.  

 O rexedor sinalou que se trata dun incidente puntual, e confía en que a situación no ocio nocturno camié cara a moderación de forma progresiva. En todo caso, indicou, o dispositivo especial de vixiancia manterase nas próximas semanas. 

En canto ás incidencias provocadas polo temporal, na noite do sábado, Sánchez Bugallo explicou que “hoxe mesmo” se retirarán ás árbores caídas nas beiras do Sarela, para facilitar o uso do paseo peonil   Sobre o mal tempo, Bugallo limitou as incidencias a algunha caída de árbores, especialmente nos bordos do Río Sarela e que hoxe mesmo se retirarán para facilitar o uso do paseo peonil”. Outra das consecuencias do temporal foi a caída de gallas en varios puntos do concello. Sinala o alcalde que non hai “motivos para crer que teñamos unha situación de perigo”, e lembrou que o servizo de mantemento de parques realiza un seguimento e control periódico destas zonas.