O alcalde de Santiago, Xosé Sánchez Bugallo, destacou hoxe a “imprescindible e urxente” necesidade de “dotarnos dun instrumento” para “programar e mobilizar solo,  promovelo e facilitar, sobre todo, a construción de vivenda protexida”. Unha ferramenta, recordou, como Emuvissa, a Empresa Municipal de Vivenda e Solo. 

Onte o pleno muncipal aprobaba, cos votos a favor do Grupo Socialista e do BNG, o inicio do procedemento para a creación dunha sociedade mercantil, con capital do Concello, cuxo obxecto e finalidade sexa a actividade urbanística, especialmente a promoción, tenencia, xestión e administración do solo e o patrimonio, vivenda e equipamentos urbanísticos; e a constitución da Comisión Especial encargada da elaboración da Memoria Xustificativa e Proposta de Estatutos da citada sociedade. PP e Compostela Aberta abstivéronse. 

Na rolda de prensa do venres, o rexedor informou que nos orzamentos de 2022 hai habilitada unha partida de 120.000 euros para esta sociedade. Recordou que durante os anos en que estivo operativa Emuvissa, entre 2.000 e 2011, “elaborou e aprobou os plans parciais de 16 polígonos, 13 de vivendas e 3 de solo industrial”; e “promoveu a construción de 2.499 vivendas protexidas, e 2.084 vivendas libres. “Ata  o día de hoxe, seguimos, dalgunha maneira”, sinalou, “vivindo das rendas desta actuación”. 

Sánchez Bugallo indicou que esta sociedade “era unha referencia en toda España. Foi unha desgracia, a decisión que tomou un determinado alcalde, que no seu primeiro acto promoveu a súa disolución e a paralización total da empresa. Foi un desastre para a cidade. Desde aquela non se volveu promover ningún polígono de vivenda e moito menos de vivenda protexida; e por suposto, ningún polígono industrial”. 

Nós necesitamos solo industrial en Santiago”, continuou Sánchez Bugallo. “No Polígono da Sionlla quedan 256.000 metros cadrados por vender, o que quere dicir é que como moito, quedan dous anos de capacidade dese polígono. Polo tanto vaise esgotar”. O rexedor recordou que en 2011, “Emuvissa tiña aprobados dous polígonos de solo industrial: o 37.1, a continuidade de Finsa, e o 38, que é o toda a fronte de Finsa. Os dous quedaron paralizados”, igual que no Polígono da Pulleira, con 2.209 vivendas, que quedara todo aprobado e quedou paralizado. Non fixo nada” desde entón, reiterou o alcalde. 

Sáchez Bugallo recordou que durante o mandato de Compostela Aberta non se construiu ningunha vivenda protexida. “Creo que iso debe ser unha reflexión que lles debe indicar a necesidade e urxencia de promover unha empresa” de promoción do solo. A maiores, indicou, tería outra serie de funcións, como “promover a urbanización e construción de aparcamentos; ou con relación á cidade histórica, a xestión do rexistro municipal de solares”. Explicou que “o concello levaría a parte administrativa, pero se ese edificio non se mobiliza, parasaría a Emuvissa; que é a que se faría cargo da súa expropiación e da súa xestión”. 

O Pleno tamén aprobou instar á Xunta de Galicia á creación e regulación dunha taxa sobre estancias turísticas que permitan gravar as estancias con ou sen pernoctación, que teña en conta as peculiaridades do turismo existente no concello de Santiago de Compostela, e que achegue recursos ós concellos para favorecer un turismo sostible. Hoxe, o alcalde, sinalou que se trasladará este á Comunidade Autónoma, “e na medida que convirta iso en lei, seguiremos dando pasos adiante. Mentras iso non sexa lei o outro e falar e razoar, sen ningunha posiblidade e proxección real”.