Subscríbete ao noso boletín
Recibe no teu mail cada semana un resumo das novidades no PSdeG Santiago de Compostela
O alcalde de Santiago, Xosé Sánchez Bugallo, anunciou que se presentaron cinco ofertas ao concurso de recollida de lixo e limpeza viaria. Catro para o contrato xeral, o lote I, que son Ascán Servicios Urbanos, Urbaser, UTE Geseco-Copasa-Espina, e Valoriza Servicios Medioambientales. Para o lote II, destinado a empresas sociais, presentouse unha oferta, a de GOGAMI. “A nosa intención”, sinalou o rexedor, “é ter adxudicado o contrato para o mes de outubro, e que o servizo empezara a funcionar o primeiro trimestre do ano que ven. Esas previsións mantéñense na situación na que estamos”.
Asegurouno na rolda de prensa dos venres, na que tamén sinalou que se está reforzando o servizo de transporte na liña seis, a que vai ao aeroporto. Pero, engadiu, o “principal problema que estamos tendo é a limitación de aforos”. O alcalde pide unha ampliación dos mesmos no transporte urbano “por parte do órgano competente”. “Estanse dando pasos en ampliar esas limitacións na hostalería, nas festas, nas reunións familiares…, sen embargo, no transporte público non se revisou. Os autobuses están funcionando ao menos do 50% da súa capacidade”. Nun bus urbano poden viaxar ata 90 persoas, pero o límite, neste momento, son 40. Segundo lembrou Sánchez Bugallo en Santiago “están utilizando o transporte público arredor de 19.000 persoas cada día”, un 70% das aproximadamente 26.000 que “o utilizaban hai dous anos”.
Engadiu que “lle trasladamos a Monbús o noso interés en que se lle dea unha solución a estes traballadores” que viñan cubrindo esa liña e que agora ao cambiar de concesionaria, non foron contratados, “pero tamén é certo que é unha decisión da empresa. Espero que ao final haxa unha solución razonable e favorable para os traballadores. Nese sentido a anterior concesionaria, creo que non foi realmente correcta, porque este tema podía e debía estar resolto”.
Recordou, por outra banda, que o próximo 5 de xullo remata o prazo de presentación de ofertas para a nova estación do AVE de Santiago. Con esta licitación, sinalou, despéxanse as dúbidas que “tiñan algúns”, e “confiamos que antes de fin deste ano ou principios do que ven, poida ser adxudicado” e que comecen as obras.
Sánchez Bugallo tamén anunciou que, segundo lle acaba de comunicar ADIF esta mañá, “van buscar a maneira de restaurar o vagón” que se atopa na explanada da estación de tren de Santiago, coñecido como Verderón, para “que os composteláns poidan desfrutar del”.
Peleteiro
Sobre o proxecto Peleteiro, o rexedor explicou que “estamos traballando intensamente para darlle unha saída. Temos unha oportunidade extraordinaria para sacar adiante este tema, e que no ano 2026/2027 estea completada esa operación. E temos unha responsabilidade compartida”, porque, engadiu, “precisamos o acordo coa propiedade”, debemos levalo a cabo “con absoluta seguridade xurídica, e temos que buscar acordos con outras formacións políticas que viabilicen o proxecto, porque isto require maioría absoluta” no pleno. “É un tema complexo”, subliñou, “e hai un certo nivel de corresponsabilidade entre todos. Espero que sexamos capaces de atopar unha solución viable e razoable”.
Unha solución, engadiu, “con seguridade xurídica”, e cun proxecto que debe “tapar as medianeiras, e cunha praza útil e utilizable”. Neste sentido recordou de novo as vantaxas de que sexa unha praza soleada, orientada a San Pedro de Mezonzo, “axeitada e acolledora para a realización de actividades”. Tamén lembrou que é preciso un acordo coa propiedade, acordo acadado co actual proxecto. Sen ese acordo, precisou, “non sería viable a operación”.
Outros asuntos
O alcalde tamén anunciou que o próximo martes, día 15, está previsto convocar unha reunión cos medios de comunicación para facer balance dos dous anos de goberno municipal.
A preguntas dos xornalistas, sobre a utilización do espazo contiguo á Colexiata de Sar como aparcamento, Sánchez Bugallo, explicou que “é unha propiedade privada”, de titularidade eclesial, que está falado co párroco e que “deberán tomar as medidas que consideren oportunas. Nós apoiaremolos en todo o que poidamos”. Por outra banda, o alcalde espera que “neste mes se poida resolver a convocatoria” de adxudicación de espazos de venda ambulante, no que están incluidos os cariños dos xeados; e das medalleiras.
O alcalde compareceu, na primeira parte da rolda de prensa, xunto á responsable da área de comercio, Lucía Castro, quen explicou as actividades de dinamización do sector que terán lugar os venres pola tarde, e sábados, tanto pola mañá pola tarde, do mes de xuño co obxectivo de animar a cidadanía a saír á rúa e a mercar nos establecementos composteláns.
Recibe no teu mail cada semana un resumo das novidades no PSdeG Santiago de Compostela