O concelleiro de Mobilidade critica que “os mesmos que deixaron o tempo correr pretendan rentabilizar políticamente” a situación do transporte urbano da cidade. Gonzalo Muíños acusa ademais a Borja Verea de eludir as súas responsabilidades como deputado: “hai un señor que cobra case 60.000 euros ao ano do Parlamento de Galicia, bastante máis que o noso alcalde, por adicarse as 24 horas do día a facer campaña electoral en lugar de tentar resolver os problemas dos galegos e dos veciños de Santiago”.

Muíños ve isto como un “fraude” e síntoma de “moi pouca ética de alguén que se candidata para ser alcalde”, e esíxelle ao presidente dos conservadores que “empece por dar exemplo e presente a súa dimisión como parlamentario ou renuncie ao salario que percibe por un traballo que é público e notorio que non realiza”, ao tempo que lle pida que asuma tamén a culpa que teñen os populares da actual situación dos autobuses urbanos. 

“Fala de buses de 16 anos, se bota contas, un autobús que agora ten 16 anos, cando gobernaba o PP xa tiña cumplidos os 9, e o goberno do PP non renovou ningún autobús desde o 2012”, critica Gonzalo Muíños, que insiste en sinalar que o partido que preside Verea “cando pudo, nada fixo”, e o seu deixamento de funcións contribuíu a xerar a actual situación. Sentencia Muíños que “daqueles barros, estes lodos”.

Muíños lamenta ademais que a solicitude dunha comisión de investigación veña motivada “pola mesma persoa que vetou unha investigación sobre o ocurrido nas residencias de maiores no 2020 durante a pandemia”. 

Varias modificacións retrasaron os pregos

Gonzalo Muíños que defende a súa xestión para sacar adiante uns pregos que se frenaron ata en tres ocasións “primeiro debido á pandemia e o impacto que tivo no número de usuarios, e despois á trasposición dunha normativa europea que obriga a que todos os vehículos sexan de baixas emisión e incrementa o número de autobuses de emisións 0”. 

Explica Muíños que xa nos pregos iniciais contemplábase unha parte da flota híbrida, máis os cambios supuñan un gran desfase económico que obrigou a refacer os estudos económicos. Agora, ese novo prego adaptado ás directrices europeas está no último dos chanzos da súa tramitación, e a convocatoria do novo concurso realizarase de xeito “inmediato”. 

En todo caso, estase a traballar para mellorar o servizo de autobuses de xeito inmediato a través do aluguer de vehículos ou a compra de novas unidades por leasing. Mentres, o concelleiro insiste en que o transporte colectivo é  completamente seguro: “todos teñen a súa ITV pasada, son revisados cada 6 meses e ao remate de cada xornada”.