Subscríbete ao noso boletín
Recibe no teu mail cada semana un resumo das novidades no PSdeG Santiago de Compostela
O alcalde de Santiago, Xosé Sánchez Bugallo; o ministro de Transportes, Mobilidade e Axenda Urbana, José Luis Ábalos; e o secretario xeral de Axenda Urbana e Vivenda, David Lucas; asinaron o protocolo xeral de actuación para a Axenda Urbana de Santiago de Compostela. O documento recolle a colaboración entre os organismos asinantes para a realización dun Plan de acción por parte da entidade municipal que sirva de proxecto piloto para outros municipios no ámbito da Axenda Urbana Española. No acto da sinatura tamén estiveron presentes o novo delegado do Goberno en Galicia, José Miñones; a presidenta de ADIF, Isabel Pardo de Vera; e a concelleira de Urbanismo, Mercedes Rosón.
José Luis Ábalos, que tamén asinou no Libro de Ouro da cidade, anunciou que nas próximas semanas ADIF licitará as obras da estación de alta velocidade de Santiago aínda que non se sobrepasase o umbral dos 3,5 millóns de pasaxeiros. Precisamente, a retirada desta cláusula foi un dos obxectivos prioritarios do grupo de goberno desde que Sánchez Bugallo chegou á alcaldía. O ministro explicou que non existe condicionante algún patrimonial nin técnico que requira un novo convenio. “A construción asumímola ao 100% desde o ministerio de Transporte a través de ADIF. Iso permítenos ser máis áxiles”. Sinalou que o proxecto se atopa técnicamente aprobado, “e xa se lanzou o procedemento para a licitación”.
Trátase, engadiu, “dun investimento de futuro, como o serán as do Plan de Recuperación, Transformación e Resilencia, moitos de cuxos programas terán que ser xestionados polos municipios”. Estes fondos, continuou, “farán posible a implantación de zonas de baixas emisións en cidades de máis de cincuenta mil habitantes, e renovarán o transporte público para reducir as súas emisións a cero”.
Tamén financiarán, continuou, o Plan de Renovación e Rexeneración Urbana, “clave para acadar os compromisos medioambientais” e para “a recuperación económica polos seus efectos na creación de emprego, intensificando así os investimentos que xa ven re
alizando o Ministerio en áreas de rexeneración e renovación urbana”. Ábalos citou, en concreto, a rehabilitación de distintas zonas da cidade, no casco histórico e nos barrios de Pontepedriña, Vite, ou no polígono de Vista Alegre a través do Plan Estatal de Vivenda 2018-2021.
Recordou tamén as actuacións de conservación do patrimonio realizadas a través do Ministerio, ao abeiro das convocatorias do 1,5 % cultural; enumerando distintas obras realizadas que se están desenvolvendo na catedral, como a restauración e acondicionamento das escaleiras da Praza do Obradoiro, e outros traballos no Camiño Francés, en muncipios de Lugo e da Coruña, algún deles pendentes de licitación. Engadiu que coa última convocatoria do 1,5% cultural, a restauración do pavillón historicista e o muro perimetral de San Martiño Pinario recibirán unha subvención de máis de 800.000 euros.
Protocolo
O obxecto do protocolo de actuación é dotar de formalidade á colaboración entre a Secretaría Xeral de Axenda Urbana e Vivenda e o Concello de Santiago de Compostela, así como expresar a vontade da Secretaría Xeral de Axenda Urbana e Vivenda de tomar en consideración o Plan de acción do Municipio de Santiago de Compostela como proxecto piloto da Axenda Urbana Española como boa prática e experiencia transferible que pode orientar a outros municipios na elaboración dos seus respectivos plans de acción.
Despois da sinatura do protocolo, Xosé Sánchez Bugallo sinalou que a Axenda Urbana é “o gran reto desta década, o reto no que traballa o goberno de España; e nós queremos traballar en colaboración, aprendendo os uns dos outros, aproveitando todas as sinerxias”.
O alcalde sinalou que os grandes retos da cidade relacionados co Ministerio de Transportes, como “o remate do orbital e o orbitaliño, no periférico de Santiago; e a construción da estación de alta velocidade, avanzan”, o que agradeceu ao ministro e ao seu equipo. Aínda que engadiu “seguiremos insistindo para conseguir o cumprimento dos obxectivos da cidade”.
O ministro agradeceu a Sánchez Bugallo “haber impulsado este plan que aspira a deseñar un modelo sostible, produtivo e solidario”. Destacou o modelo de rehabilitación de Compostela e dirixíndose ao alcalde engadiu que “é unha referencia para os socialistas”. José Luis Ábalos engadiu que “cos antecedentes de Santiago, e co seu alcalde, esta é unha ocasión para aprender, porque xa destes moitos pasos, e porque ofrecestes, desde o ámbito local, respostas adecuadas aos grandes desafíos globais que temos plantexados. Máis que a ensinar a Santiago, vimos a aprender, engadiu”.
Ábalos citou a EDUSI, a Estratexia de Desenvolvemento Urbano Sostible Integrado, ou o proxecto Smartiago, como exemplo de innovación e desenvolvemento. Engadiu que este protocolo de Axenda Urbana ven a reforzar o compromiso do goberno municipal coa xestión e conservación da cidade histórica, “coa recuperación de actividades comerciais e culturais, a mobilidade sostible ou a accesibilidade universal”. Todo iso, engadiu, mellora a calidade de vida e rexenera espazos públicos en favor das persoas. A cidade que “estades repensando”, engadiu, pon en valor “actuacións nos barrios para dinamizar a economía, con infraestruturas que permiten atender aos colectivos máis desfavorecidos”. “Un proxecto de cidade para o futuro”, continuou, desde unha perspectiva planificada, coherente, estratéxica, que favoreza o seu desenvolvemento no marco que propon a Axenda Urbana Española.
O ministro sinalou que Santiago é unha cidade “que mira ao mundo, e que coopera con outras cidades”. Engadiu que “compartimos obxectivos tan prioritarios como garantir o dereito á vivenda, fomentar a cohesión social, rexenerar espazos urbanos ou rehabilitar o patrimonio arquitectónico. Pídovos que vaiamos da man para acadar estas metas, que enfrontemos unidos o triple reto territorial, demográfico e socioeconómico, e que xuntos tratemos de dar resposta ás necesidades da cidadanía, que esixen melloras na mobilidade, vivendas asequibles, traballos dignos, infraestruturas produtivas e investimentos de futuro”, subliñou.
José Luis Abalos aclarou que a Axenda Urbana de Santiago de Compostela non é unha norma, é unha estratexia, “que non xera obriga algunha, salvo a da mútua colaboración. A posta en común dos problemas e as solucións que ofrezamos aos ministerios, enriquecerán a Compostela, tamén a este ministerio e a outras entidades locais que queiran liderar os seus plans de acción: mellores espazos, mellores contornas, cidades máis inclusivas, máis humanas. En definitiva, unha oportunidade para planificar o futuro da cidade cun carácter transversal, integrado e participado”, finalizou.
O protocolo entrará en vigor a partir da data da súa firma e terá unha duración de dous anos, podendo ser prorrogado automaticamente por períodos de igual duración con anterioridade á expiración do prazo convido.
AUE
A AUE (Axenda Urbana Española) é un documento estratéxico, sen carácter normativo, e por tanto de adhesión voluntaria, que, de conformidade cos criterios establecidos pola Axenda 2030, a nova Axenda Urbana das Nacións Unidas e a Axenda Urbana para a Unión Europea persegue o logro da sustentabilidade nas políticas de desenvolvemento urbano. Ademais, a Axenda Urbana Española constitúe un método de traballo e un proceso para todos os actores, públicos e privados, que interveñen nas cidades e que buscan un desenvolvemento equitativo, xusto e sustentable desde os seus distintos campos de actuación.
Recibe no teu mail cada semana un resumo das novidades no PSdeG Santiago de Compostela