• O abono mensual pasaría dos 128,20 euros que custa actualmente aos 61,30 que se cobran na actualidade en Xoán XXIII, xestionado por Tussa
• “O obxectivo é conseguir que todos os veciños e veciñas de Santiago, residentes no centro, no rural ou nos barrios, teñan unha rebaixa importante no prezo do aparcadoiro” explicou o alcalde

Santiago de Compostela, 26 de maio de 2023. Co remate da concesión dos aparcadoiros de Praza de Galicia e Praza de Vigo, o alcalde xa anunciou a súa decisión de recuperalos para a xestión municipal procurando unha importante rebaixa nas tarifas, chegando ata o 65% de aforro, aproximándose aos 1,31 euros que custa actualmente a primeira hora no aparcadoiro de Xoán XXIII.

Suporía un aforro de 69 céntimos na primeira hora de estacionamento e ata a metade de prezo no abono mensual. Ese será o efecto de recuperar para a xestión pública os dous aparcadoiros, pasando dos 128 euros que custa na actualidade aos 61 euros que se pagan en Xoán XXIII.

Unha revisión de prezos á baixa que non se limitará aos aparcadoiros que se recuperen para a xestión pública. Segundo explicou o alcalde o obxectivo é “abordar unha negociación con tódalas concesionarias dos aparcadoiros da cidade para conseguir que todos os veciños e veciñas de Santiago, residentes no centro, no rural ou nos barrios, teñan unha rebaixa importante no prezo do aparcadoiro”.

Así o resultado será un aforro xeneralizado nas economías familiares “ofrecendo un servizo de calidade ás veciñas e veciños que precisan usar eses aparcadoiros por motivos laborais, para facer a compra ou simplemente por ocio” ao tempo que “reducimos a súa carga económica” concluíu o alcalde.