Subscríbete ao noso boletín
Recibe no teu mail cada semana un resumo das novidades no PSdeG Santiago de Compostela
O alcalde de Santiago, Xosé Sánchez Bugallo, presentou á prensa a proposta de axudas para os sectores económicos máis castigados pola pandemia, que ascende a 5.207.026,07 euros, despois de presentarlla o pasado martes aos grupos da oposición na Xunta de Voceiros. Trátase, sinalou, “da maior convocatoria de axudas dun concello de Galicia. Non teño coñecemento de ningún que teña un programa deste contido que en termos orzamentarios quintuplica” as subvencións da Xunta.
Nesta proposta están incluídos 2.458.929,07 millóns de euros correspondentes ao remanente de 2020. O obxectivo, segundo explicou o alcalde, é “levalos ao pleno do vindeiro día 29”. Pero antes teñen que ser aprobadas en Xunta de Goberno e ir a ditame da Comisión informativa de Presidencia, Réxime Interior, Facenda e Especial de Contas.
A estes remanentes de 2.458.929,07 euros súmase un millón de euros aportados pola Deputación da Coruña; 1.398.097 euros que sobraron do remanente de 2019 e distintas aportacións dos orzamentos de 2021, que suman 350.000 euros. Supón, sinala o alcalde, “máis do 4% do presuposto municipal, polo que en termos orzamentarios, o concello de Santiago fai un esforzo enorme”.
Son, en total, 5.207.026,07 euros que se repartirían do seguinte xeito:
4.256.097 van ser axudas directas ao comercio, a hostalería e a cultura. Estas cantidades concretas, sinalou o alcalde, “poden verse alteradas no caso de que o pleno do día 29 non autorice o reparto dos 2.458.929,07 euros do remanente de 2020, ou adoptara un acordo diferente” o da proposta presentada hoxe á prensa.
O alcalde recordou que esta é a primeira proposta de axudas para 2021; e engadiu que en comercio e hostalería “estamos preparando unha segunda convocatoria que sairía no verán”.
Covid-19
Sánchez Bugallo tamén explicou, na rolda de prensa, que Santiago bateu o record de persoas denunciadas por non usar máscara. Son en total 20 casos, segundo a información facilitada pola policía local. No lado contrario estarían as inspeccións en bares e restaurantes. En todas elas comprobouse, subliñou “que se estaba cumprindo a normativa” e que non había irregularidades.
Sobre a evolución do coronavirus na cidade, admitiu que os datos actuais son “bos”, con 55 positivos e unha incidencia acumulada a 14 días de 51 casos por 100.000 habitantes. Son, sinalou, “significativamente mellor que a media de Galicia e moito mellor que a media española”.
A continaución expresou a súa preocupación polo crecemento de casos noutras comunidades e apelou á prudencia e á responsabilidade. Cualificou de “datos moi preocupantes” os que están chegando de comunidades como Madrid ou Cataluña, e engadiu que “non pode haber ningunha rebaixa nas medidas de seguridade”. Cómpre, indicou, seguir respectando as normas.
Emisión rolda de prensa do alcalde
Recibe no teu mail cada semana un resumo das novidades no PSdeG Santiago de Compostela